David Ferrer chuan Madrid Open-ah Alexander Zverev a hneh lo a, tennis khelh a chawlhsan thu a puang zui nghal.
Madrid Open second round-ah David Ferrer leh Alexander Zverev te chu an inkhel a, he inkhelah hian Zverev chu 6-4, 6-1 in a chak a, Ferrer-a zinkawng chu a tawp a ni.
Kum 37-a upa Spaniard hian a hmain tun tournament bak chu khelh zui a tum tawh loh thu a lo sawi tawh a. A kum a tam chho ve tawh bawk nen, tunlai thangtharte chu a pawl pha ta meuh lo niin a sawi a, duhthusamin a fit tak tak thei tawh lo niin a sawi.
Ferrer hian kum 20 chhung chu tennis a khel ve hman a, hengah hian singles title 27 a la hman a, la inkhel mek zingah chuan a tha ber pangana a ni a, Roger Federer, Rafael Nadal, Novak Djokovic leh Andy Murray te chiah tluk loh a nei a. Match 1,111 khel hmanin, hengah hian vawi 733 zet chu a chak a ni.
An inkhelh zawhah hian center court ‘Magic Box’ a inkhel entu mipui khat deuh vekte chuan David Ferrer chu standing ovation an pe a. Hemi hnuah hian Ferrer chu court chhungah a kir leh a, a lu hrenna chu net bul, leiah chuan a hnutchhiah a ni.
Amah thlahna hun tawite an buatsaihah Ferrer chuan, “Hemi ni hi engtikah mah ka theihnghilh thei tawh dawn lo. Ka vannei em em a, hetiang tak hian ka hun hi tihtawp ka lo duh thin a, ka suangtuah ang takin thil a kal thei hi lawmawm ka ti tak zet a ni,” a ti.
“Inelna boruak sang tak karah tel ve reng chi ka ni tawh lo a, ka hun tawn chhoh zawng zawngah khan ka lawm a, a lungawithlak ka ti a, ka vanglai hun hman danah khan lawm lohna ka nei miah lo a ni,” a ti bawk.
Hun an hman lai hian court sirah screen lian deuhin tennis player dangte’n Ferrer an thlahna thu an tilang zut zut bawk a. A pachanna te, a thawhrimna te, a tlawm duh lohna te chu a khelhpui thinte chuan an fak hlawm hle.
2013 French Open final-ah Rafael Nadal nen an inkhel a, Grand Slam title match a khelh theih chhun niin, hetah hian Ferrer chu a chak lo zawkah a tang a. Hemi kumah hian Ferrer chu World No. 3 niin, hei hi ranking-ah chuan a thlen san ber niin, Top 10 huang chhungah pawh season 7 zet chu a awm a. Spain chu Davis Cup title vawi 3 a lakpui hman a ni.