​Darkar 5 chhungin Aizawl FC vs Bengaluru FC match ticket 80% hralh zawh a ni !

12th January 2016, 11:01PM

January ni 16, 2016 hian Aizawl chuan a vawi khat nan I-League match a thleng dawn. Rajiv Gandhi Stadium-a Aizawl FC leh Bengaluru FC inkhel tur hi Mizo mipuite chuan an ngaihven hle a, January ni 12, 2016 khan ticket zawrhchhuah tan a ni a, zawrhchhuah a nih atanga darkar khat chhungin ticket chanve a zo nghal vek !

Ticket hi Rs, 200, Rs. 500 leh Rs. 1000 mante a ni hlawm a. Ticket zawng zawng atanga a zatve vel hi Rs. 200 man a ni a. Rs. 200 man hi darkar khat chhunga hralh zawh vek a ni ta a ni. Rs. 500 man pawh hralh a kal hle a, chawhma chhung khan engemaw zat hralh a ni a, tlai lamah phei chuan a zo tep tih a zuartuten an sawi nghe nghe a ni.

Ticket zawrh chhuah a nih ni khatnaah 80% hralh zawh a ni nghal tih a chiang a, Rajiv Gandhi Stadium hi sak lai mek a ni a, hei vang hian South Stand chiah mipui thutna a awm thei dawn, hetah hian mi 8000 chuang leng dawn mahse venhimna lam ngaih pawimawh a nih avangin ticket hi 6000 vel chiah siam a ni a. Ni hnih chhungin ticket zawng zawng hi hralh zawh vek a ni ngei dawn tih a lang chiang ta a ni.

Mizote hian Football kan hmangaih a, Football tan chuan sum pawh kan seng huam tih heta tang hian a lang chiang hle. Rajiv Gandhi Stadium hi sak zawh a nih hunah chuan mi sing thum chuang an leng thei dawn chiang a. Chumi hunah pawh chuan inkhel pawimawh en tur mipui sing chuang chu an pungkhawm thei reng dawn tih a lang chiang a ni.

AR Lammualah tualchhung tournament mai maiah pawh mi sing chuang an pungkhawm reng thei a, a hmun hmain dawl zo phei selang chuan kan population ngaihtuaha North East-a inkhel en hnem ber kan ni deuh reng thei ngei ang le.

Copyright © inkhel.com 2021. All rights reserved.