Danielle Collins-i'n a ngaihsan ber Venus Williams a hneh

29th March 2018, 04:03PM

Miami Open quarter final-ah Danielle Collins chuan tennis khawvela a ngaihsan ber hmachhawnin, Danielle hi a chak zui a. A hun tawn tawhah chuan ropui a la tih ber tum a ni.

2000 kum Wimbledon-a Venus Williams a champion khan American mi Danielle Collins hi kum 6 mi chauh a la ni a. Key Biscayne-ah hian Danielle Collins chuan tennis khel zinga a ngaihsan ber Venus Williams chu a hmachhawn a, harsa lem lo takin 6-2, 6-3 in Danielle hian 8th seed Venus hi a hneh a. Semi final-ah chuan 6th seed Jelena Ostapenko nen an inkhel ang.

An inkhelh zawhah Collins chuan, “Inthlakna room-ah Venus ka hmu kha chu ka tap lo chauh a ni,” a ti a. “Ka hriat theih tirh ata ka ngaisang em em mai a, tennis player zingah chuan ka duh ber a ni a, a aia duh hi ka neih leh ngai pawh ka ring lo a. Ka hneh thei hi a ropui a, hetiang tluka hun danglam leh ropui hi ka tawn leh pawh ka ring lo a. Awih harsa ka la ti,” a ti bawk.

Collins hian hmanni lawk khan Indian Wells-ah US Open finalist Madison Keys pawh a lo hneh tawh a. Helai hmuna vawi thum lo champion tawh Venus Williams a hneh chiah chuan a ban pahnih a phar a, lawmin a au a. An inchibai lai pawhin Venus pawhin a nuih sang a ni.

2014 leh 2016 a Virginia-a NCAA champion lo ni tawh, World No. 93 Danielle Collins hian tun hnaiah sum pawh a hlawh tha chho viau mai a. Key Biscane-a rawn pan lai chuan tennis hmanga a sum lakluh tawh chu $305,385 a ni a, semi final a thlen avangin a lo berah $327,965 velah a chho thei dawn a. World ranking lamah pawh a lawn sang leh deuh thei dawn a, a hniam berah 67-na velah chuan a chho ngei ngei dawn a ni.

Qualifier zingah Key Biscane-ah chuan kum 24-a upa Danielle Collins hi a thleng sang thei ber a la ni a. Semi final thleng chho tur hian a kalkawngah 4th seed Elina Svitolina chu 7-6 (3), 7-6 (5) in a lo hneh tawh bawk a ni.

Semi final lehlamah No. 13 Sloane Stephens leh Miami Open-a vawi thum champion tawh Victoria Azarenka te an inkhel ang.

Copyright © inkhel.com 2024. All rights reserved.