02 Dec 2017 07:31

inkhel

Damchhung atan Russian athlete pathum hrem an ni

International Olympic Committee (IOC) chuan Russia infiammite an chhuina kal zelah hrem an nei zui zel a, an hremte hi damchhung atan Olympics-a tel an phal tawh dawn lo.

An hrem thar pathumte hi Yulia Chekaleva (cross-country skier), Anastasia Dotsenko (cross-country skier) leh Olga Zaytseva (biathlete)-te an ni.

Zaytseva hian 2014 Sochi Winter Games-ah khan biathlon relay-ah silver medal a dawng a, Chekaleva leh Dotsenko-te hi chu hremna tawk tawhsa an ni thung.

Kum 2016 December thlaa tihchhuah McLaren report-in an tarlan danin kum 2011 leh 2015 inkar khan Russian athlete tam tak chuan state-sponsored doping programme hmang țangkaiin hlawkna an nei tih puanchhuah a ni a, endikna an neih hnuah damdawi hman phalloh hmang infiammi 22 chu damchhung atan hrem an ni tawh.

South Korea-in a thlen tur 2018 Winter Olympics-ah pawh Russia hi an tel thei lo maithei a, December ni 5 hemi chungchang hi tihfel a ni ang.