Snooker match-fixing chungchangah player tha pahnih  Liang Wenbo leh Li Hang  te chu, dam chhunga he infiamna huanga tel thei tawh lo tura hrem an ni a. 

Anni rual hian World Professional Billiards and Snooker Association (WPBSA) chuan player dang 8 pawh an hrem bawk a ni. Heng an hrem zawng zawng hi Chinese player vek an ni bawk.

Heng Snooker player hrem te hi, match fixing chungchanga hrem an ni a, pawisa inthapna lamah inrawlhin, an game khelh chu inthapna lamah an chhawr tangkai a, thil tenawm tak a nih avangin World Professional Billiards and Snooker Association (WPBSA) chuan an chungah hremna a lek ta a ni.

2021 Masters champion Yan Bingtao chu kum 5 chhung atana hrem a ni a, kum 2027 December ni 11 thleng a hremna hian a awh ang. Tin, UK Championship winner Zhao Xintong  pawh thla 20 hrem a ni a, ani hremna hian kum 2024 September ni 1 thleng a awh ang.

WPBSA chairman Jason Ferguson chuan, "He thubuai hi a ril khawp mai, player naupang tak tak ten hetia WPBSA Conduct Regulations an han bawhchhia hi chu a hrehawm hle.

"Senior player pahnih te phei chu dam chhung hrem hi an phu a ni. WPBSA chu a dan siamah a ding nghet tlat a, match fixing hian snooker-ah hmun a chang lo a ni," tiin a sawi.