01 May 2020 05:29

Inkhel

Mizo Sports Website hmasa ber

​Dam aia thih hahdamthlak ring Mike Tyson

A hringnunah harsatna chi hrang hrang a tawk, sum hman a thiam loh avangin a tlakchhiat chanchin pawh kan hre thin. Hengte avang hi a ni thei ang em? Dam reng aia thih a nawm zawk a rin?

Iron Mike Tyson chu kan hre vek awm e, boxer piang tawh zawng zawng zingah chuan tawrawt ber ang hiala sawi thin a ni. California-a a chennaah The Sportsman chuan tlawhin interview a neihpui a, hetah hian thih a hlauh loh thu leh damchhung khawsak hahthlak hmachhawn reng ai chuan thih a nawm zawk a rin thu Mike Tyson hian a sawi.

Mihringte hlauh ber nia an sawi thin chu thih hi a ni kan ti thei awm e, mi huaisen Mike Tyson hian a huaisen avangin thih a hlau lo a ni hran lo, "Thih chu ka hlau lo, khawvel nun buaithlak tak kalsana thih hi kei chuan a hahdamthlak zawk ka ring a ni," tiin Mike chuan a sawi.

"Ka rindan hi a dik em tih erawn chu ka hre bik lo. Chutih laiin khawvela khawsak hi huaisen a lo ngai zawk niin ka hria. Huaisenna tel lo chuan dam reng hi a theih dawn loh niin a lang. Nun hi zinkawng a ni a, nun hi harsatnain a bual vel bawk a.

"Engkim nei ho pawhin engmah an ti hleithei chuang lo, harsatna tam tak an tawng vek. Mahni hi danglam bik angin kan inngai vek, han inngaihtuah chiang ila, engmah hi kan lo ni lo, larna te pawh hi engmah lo mai a lo ni e," tiin kum 53 mi Tyson chuan a sawi.

Boxing a khelh laiin thih chungchang a ngaihtuah ngai em? Tih zawhna chu, "Training hautak tak ka nei thin, fight hautak em em ka hmachhawn thin bawk, chungah chuan thih hi a lo awlsam dawn hle mai tih chu ka ngaihtuah thin.

"Thih hi ka hlau ngai lo, chutih laiin nung dam zawk nih erawh ka thlang char char, chu chu chuan damkhawchhuahna kawng min kawhhmuh zawk a ni. Tunah erawh thil tam tak ka lo tawng tawh a, reh hmak emaw thih bo hmak emaw hi a chakawm tawh zawk niin ka hria," tiin World heavyweight champion lo ni tawh Mike Tyson chuan a sawi.