25 Jul 2019 09:32

inkhel

Dadashev thihna avangin combat sports ka haw tan: Khabib

Khabib Nurmagomedov chuan boxer Maxim Dadashev thihna avang khan combat sports lampang chu a haw tan riau niin a sawi.

Russian boxer Maxim Dadashev hi Zirtawpniah khan Maryland, USA ah Subriel Matias nen an inhnek a, round 11-naah TKO in Subriel Matias hi a chak a. Dadashev hian boxing ring a chhuahsan hnu deuh lawkah nikhua a hre lo zui a ni.

Dadashev hi rang takin damdawi in an panpui nghal a, UM Prince George’s Hospital Center-ah an dah lut nghal a. A thluakah chuan thi put a awm tih an hmu a, a vung nasa zel si a, a vung nasa lutuk tur tihziaawm nan darkar hnih chhung chu a thluak hi an zai a ni.

Mithiamte chuan theihtawp chhuahin enkawl mahse Dadashev hi a hliam tuar loin Thawhlehni khan a thi zui ta a. Boxing khawvel mai bakah MMA khawvel chu a nghawr nghing viau a ni.

UFC lightweight champion Khabib Nurmagomedov chuan, “He thil thleng hian infiamna aia thil pawimawh zawk tam tak a awm a ni tih min hriat thartir leh a. Hetiang kaihhnawih chanchin ka hriat emaw, ka hmuh emaw hi chuan combat sports hi ka huat thar phah thin,” tiin a sawi.

“Engmah hi kumhlun tur a awm lo a, ropuina te, pawisa te, title te, mihring nunna hrim hrim te hi chatuan daih tur a awm lo a. Khawvel kan la chhuahsan vek dawn a, tu mah hi cham hlen tur an awm lo a ni,” a ti bawk.

A sawi zelnaah, “Maxim-a chhung leh khatte ka rilruah an awm reng a. Kan dam chhung hian thil tha tak tih tum zel ila, Pathian chuan kan chet dan avangin malsawmnain min vur beisei ila, kan sualnate pawh a ngaidam thei ngeiin ka ring,” a ti.

Maxim Dadashev thihnain combat sports huangah chanchin a nei mek a, mi thin thawng pawh a reh hmain chanchin dangin a bawh zui ve leh a. Argentinean boxer Hugo Santillan pawh Inrinnia Eduardo Javier Abreu nen an inhnek tuma a hliam vangin a thi zui ve leh a ni.

Santillan leh Abreu te hi an inhnehtawk a, boxing ring chhunga an awm lai, result an nghah laiin Santillan chu nikhaw hre loin a awm a. Doctor te chuan rang takin an buaipui nghal vat a, damdawi in lamah an tlanpui nghal a ni.

South American boxer chu a thluaka thi put a awm a, rang takin an zai zui nghal a. Damdawi lam mithiamte chuan theihtawp chhuah mahse Hugo Santillan hi an chhan thei ta lo a ni.