August ni 18, Inrinni zan khan Central YMA leh MBBA buatsaih LBS Suzuki 7th Inter Branch YMA Basketball tournament final chu R Dengthuama Hall-ah Khatla South leh Khatla ten an khel a, Khatla derby inkhel hmuhnawm takah Khatla South chuan 84-77 a hnehna changin a vawi khat nan an champion ta a ni.

Khatla South hian Model Veng, Durtlang, Vaivakawn, Leitan leh Chawnpui hnehin final an lut a, final-ah veng thenawm Khatla hnehin an champion ta a ni.

Inkhel tan a ni a, Khatla chuan bul tan tha zawkin hmahruai zawk mahse, second quarter-ah Khatla South insiam thain F. Zonuntluanga leh Gospel-a te an thawh hlawk bawk nen Khatla South chuan 45-37 a hmahruaiin chawlh lawk an hmang ta ni.

Third quarter tan a ni a, Khatla tan Eddie-a leh Lana thawh hlawk mahse midangin an thlawp tha tawk loh bakah turnover an ngah an tuar a tih theih awm e. Khatla South an awm mai mai bik lo a, Zonuntluanga leh Rinzuala an thawh hlawk ve bawk nen Khatla South chuan 67-57 in hmaanhruai leh ta a ni.

Quarter hnuhnungberah Khatla chuan hnehna chan ngei tumin thapui an chhuah a, Lana, Eddie-a leh Remsiama te an rawn thawh hlawk hle huntawp nan minute 1 ala awmin Khatla chuan point 2 chiahin an umpha lo a, Khatla South tan hun pawimawhah Rinzuala'n basket arawn nei hlauh; Beiseina thar neiin Khatla South chuan theihtawp an rawn chhuah ve leh a, hun atawp meuh chuan Khatla South chuan 84-77 in hnehna an chang ta a ni.

Lawmman:
Champion: Khatla South, Rs 40,000/- Trophy & Medal, Certificate, Bawngtuthlawh leh Suahdur

Pahnihna: Khatla, Rs 20,000/-Trophy & Medal, Certificate, Bawngtuthlawh leh Suahdur

Semifinalist : Rs 7,000/- Chawnpui TeamYMA Branch, Bungkawn Team YMA Branch

Most Valuable Player (MVP): K. Zonuntluanga, Khatla South, Rs 3000/- Trophy & Certificate

Best Defensive Player (BDP) : Vanlalnunsanga, Khatla, Rs 3000/-Trophy & Certificate

Branch Fair Play Award: Ramthar Veng Branch YMA, Trophy & Certificate

(adsbygoogle = window.adsbygoogle || []).push({});