May ni 19, 2015 khan CT Group Cup semi final khelh a ni a, Armed Veng Branch YMA leh Lengpui Branch YMA te chuan an khingpui ve ve hnehin final an lut ta a, Final hi May ni 22, 2015 (Zirtawpni) tlaiah AR Lammualah khelh a ni ang.

Semi final hmasa zawk hi tlai dar 4-ah khelh niin, Armed Veng chuan 4-3 in Dinthar an hneh a. Armed Veng tan William Lalnunfela chuan hattrick siamin hun tawp dawna Lalropuia'n an lama a tih goal vangin Dinthar hi an chak zo ta lo a ni.

Inkhel hnuhnung zawk hi zan dar 7:30-a khelh tan niin, Bawngkawn leh Lengpui te inkhel hi a hmuhnawm kher mai. Hun pangaiah 1-1 in an inhnehtawk a, extra time khelh a ni a, hetah hian goal khat ve ve an khung leh. 2-2 in an inhnehtawk ta. Penalty Shoot out hmangin Lengpui chu 5-3 in an vannei ta a ni.

Armed Veng 4-3 Dinthar

( William Lalnunfela 19', 28', 70', Own goal Lalropuia 88') ( Lalsawmtluanga 16', Lalrinkima 41', Lalnunmawia 90+1'.)

Inter Branch YMA champion lai leh NECS Cup Inter Village Champion lai Armed Veng hian si an phur hmasa a, Lalsawmtluanga chuan tan atanga minute 16 na lekah goal hmahruai Dinthar tan a khung. He goal hi William-a chuan Armed Veng tan a rul a, William hian darkar chanve an khelh tlin hma hretin goal hnihna a khung lehnghal a, 2-1 in Armed Veng chu hma a hruaipui.

First half tawp dawnah Lalrinkima chuan Dinthar si phurh a rul a, 2-2 in first half-ah an inhnehtawk. Second half-ah Armed Veng hian penalty an hlawh chhuak a, William chuan keeper vei lamah a pet, Dinthar keeper C Lalrinsanga chuan a save teuh hle, William chuan hattrick a siam ta a. Hun tawp dawn minute 2 la awmin Dinthar an chesual leh hlauh. Ropuia chuan an lama tauh let a tum chu goalkeeper a tauh khum ta si a, a goal ta. 4-2 in Armed Veng chuan hma an hruai.

He own goal hi a pawi ta a ni, 90+1 mins-ah Lalnunmawia chuan Armed Veng defender te inthlahdah lai nangchingin, goal mawi tak a khung a, Dinthar hian an si phurh rulh hram tumin theih tawp an chhuah, mahse added time hi minute 3 lek a nih si avangin an rul zo hman ta lo, 4-3 in Armed Veng chuan hnehna an chang ta a ni.

Lengpui 2-2 Bawngkawn (AET)

( Isaak Lalremruatkima 62', Joe Zoherliana 99') ( Lalhmunsiama 9', MS Dawngliana 96')

Penalty shootout 5-3

Tun Tournament-a player nei tha ber chu Bawngkawn an ni, mahse Lengpuiin an hneh tlat mai. Lengpui hi an vannei kan ti thei bawk awm e. Tan atanga minute 9 lekah Lalhmunsiama chuan Bawngkawn tan goal hmahruai a khung a. He goal hi second half 62nd mins-ah bench atanga rawn lut Isaaka chuan Lengpui tan a rul a.

Quarter final-a penalty ropui tak taka save tu Bawngkawn keeper Lalneihsanga a che sual hlauh mai. 30 yards vel atanga Isaaka pet chu Lalneihsanga hian a lo man thelh a, ho takin a chhuah. Lengpui chuan an si phurh an rul a. Extra time-ah MK-a shot chuan Lengpui goal bar a per a, hemi per hi Dawngtea chuan tauh lutin, 2-1 in Bawngkawn chuan hma an hruai.

He goal hi a hnu lawkah corner atangin Lengpui chuan an rul leh a, Joe Zoherliana chuan mawi takin Bawngkawn goal-ah a tauh lut. Penalty shoot out hmanga chak zawk zawn a ni a, MK-a pet chu Lengpui keeper Laldawngliana chuan tha zetin a lo dang a, 5-3 in Lengpui chuan hnehna an chang ta a ni.

Bawngkawn hi an vanduai kan ti thei awm e. Inkhelh chhung zawngin game an thunun a, goal hlauhawm pawh an nei teuh, Bawngkawn hian Lengpui goal woodwork vawi thum ngawt an pet per a, Dawngtea tauh Lengpui keeper in a lo save kha chu ropui tak a ni. Lengpui a tawp thlengin an tang tlang a, team game tha tak an khel a, a tawpah chu chu hnehna an chanpui ta a ni.

CT Group Cup 2015 Semi final