Mizoram chhunga Football thiam ber veng chu Armed Veng an ni. Veng leh veng inelna Tournament-ah tuma chuh phak loh dinhmun ropui an chang mek. CT Group Cup Inter Branch YMA Tournament 2015 chu khelh zawh a ni ta a, Armed Veng chuan final-ah si khat faiin Lengpui an hneh a, goal awmchhun hi William-a khung a ni.
1985 atang khan Inter Branch YMA Tournament hi khelh tan niin, vawi 18 neih a ni ta a, Armed Veng hian final vawi 10 lut tawhin, vawi 5 an champion ta a, 2010, 2012 leh 2015-ah a zawnin vawi thum Inter Branch YMA Tournament champion an ni ta. Tin, champion hmasa ber an nih bakah champion hnuhnung ber an ni mek bawk.
Kumin chhungin veng leh veng inelna Trophy lian pahnih an kawl ta reng mai. April thla mai khan NECS CUP Inter Village Football Tournament-ah Armed Veng hian Ramhlun South hnehin champion an ni a, mumal taka veng leh veng Football inelna neih tawhah record an nei tha rem rem hle, an record hi khum a har tawh khawp ang le.
Final-a goal awmchhun hi 21st mins-a William Lalnunfela goal khung a ni a, William-a hian 2nd Division I-League Aizawl FC tan khelin, Aizawl FC chu I-League a thlenpui hnuah veng tan quarter final atangin a khel tan a. Semi final-a Dinthar 4-3 a an hneh tumin William hian hattrick a siam a. Final-ah champion-na goal a khung leh avangin CT Group Cup-ah hian goal 4 a khung, top scorer a ni nghal bawk a. Final-ah hian man of the match atan thlan a ni bawk a. Top scorer leh Man of the match lawmman atang hian trophy leh Rs. 4000 a dawng a ni.
Armed Veng 1-0 Lengpui
William Lalnunfela 21'
Armed Veng XI : Andrew Lalhmingliana, Simon Lalruatkima, Lalramchullova, Lalbiakhlua, Vanlalduatsanga, William Lalnunfela, Lalnghinglova, Lalfakzuala, Lalawmpuia, Zothanzuala, B Zoramthara
Lengpui XI : Laldawngliana, Rohmingthanga, Lalthangliana, JS Lalruatthanga, Vanlalhruaia, Lalremsanga, Lalfakmawia, Lalramsanga, Joe Zoherliana, Lalrempuia, Lalbiakmawia.
Final-ah hian Armed Veng hian a tir atanga a tawp thlengin inkhel an thunun a, goal awmchhun hi 21st mins-a lut niin, Lalramchullova pass tha zet chu box chhungah William chuan a um lut a, Lengpui goalkeeper Laldawngliana chuan ben per a tum, mahse William-a chuan a nangching tawh si a, William chuan a pet goal chhunzawm ta a ni. First half-ah B Zoramthara leh Duatsanga te chuan goal an khung teuh hlawm hle.
Second half-ah a si phur zawkin an nawr dawn emaw tih laiin goal khungtu Armed Veng chuan an nawr chhunzawm zel a. Hun tawp dawn minute 10 la awmin Lengpui keeper Laldawngliana chuan a zawnin vawi hnih tha zetin a save. Duhsanga chuan box chhung chiah atangin tha zetin a shot a, hei hi Dawngliana hian a lo save, hemi per hi William chuan shot chhunzawm lehin, Dawngliana hian tha zetin a lo dang leh hman a, Hlutea free kick tha zet pawh Dawngliana hian tha takin hun tawp dawn tak takah a save bawk a ni. Armed Veng hian goal dang pawh an khung teuh thin hle, mahse William-a goal khat chu champion nan a tawk ta a ni.
Lengpui hian goal khungna chance an nei lo ti ila kan sawi sual lovang. Semi final-a goal pawimawh khungtu Isak-a chuan box pawn atangin kawh zetin a shot a, mahse a over chiah chiah. Armed Veng hian khawi line-ah pawh Lengpui hi an hneh a, Lengpui hian theih tawpin nawr tum mahse Armed Veng Forward William a tlanchak si a, ven reng a ngai bawk si nen, midfield-ah Rohmingthanga te an che hlethei bawk si lova. Lengpui hian Bawngkawn an hmachhawn angin a tawp lamah an nawr thei tawh lo a ni. Lengpui goalkeeper Dawngliana hi tun tournament chhung hian save nei hnem ber a ni hial maithei. Chutiang khawpa che tha chu ni mahse William-a goal erawh ni dang chu nise a save ngei a rinawm. 50-50 ball a ni a, khatah khan va bawhchihin man va tum selang chuan kha goal kha a lut hauh lovang le.
Fair Play hi Lengpuiin an dawng a, Rs. 20,000 leh trophy an dawng tel. Tin, Runner up Lengpui hian Rs. 50,000, Trophy leh Medal an dawng tel bawk. Champion Armed Veng hian Rs. 1,00,000, Medal leh Trophy an dawng a ni.
2012 hnuah MFA Leh Central YMA te an thawk dun leh thei hi a lawmawm hle. Chutih laiin kumin Inter Branch YMA Tournament erawh hun vawn dikah an mipui sawisel a hlawh hle. A hun chat chatah MPL tan a ni thin a, April thlaa khelh zawh tak NECS Cup pawh a hun chat chatah match tan thin a ni. Inter Branch YMA Tournament match thenkhat erawh a hun taka tan theih loh a awm nual a, hei hian mipuite a ti hrilhhai tep thin a ni.
CT Group Cup 2015 Champions Armed Veng