24 Aug 2019 09:47

bakteaJr.

Mizo tlangval

​Crystal Palace lakah a vawi khat nan United an tlawm

Manchester United chuan Premier League inkhelah London club Crystal Palace chu Old Trafford-ah an lo mikhuala, United hi 2-1 a tlawmin, a vawi khat nan Premier League bikah Crystal Palace chuan Manchester United an hneh.

Palace tan hian an player lakluh thar Jordan Ayew leh Chelsea defender hlui Patrick Van Aanholt-te chuan goal an khunga, United tan hian an player thar Daniel James chuan goal a khung ve bawk.

Khelh thumah ti hian United hi panganaah an awm a, point li an hlawhchhuak tawh. Palace hian khelh thumah point li tho hmu in sawmnaah an awm mek thung a ni.

Manchester United 1-2 Crystal Palace

(James 89’) (Ayew 32’, Van Aanholt 90+3’)

Player Ratings

MANCHESTER UNITED: De Gea 6, Wan-Bisakka 5, Lindelof 5, Maguire 5, Shaw 5, McTominay 7, Pogba 5, James 7, Lingard 5, Rashford 6, Martial 6. Subs: Greenwood 5, Matan/a,

CRYSTAL PALACE: Guaita 6, Ward 7, Kelly 7, Cahill 8, van Aanholt 6, Milijovic 6, Kouyate 5, McArthur 5, Schlupp 6, Zaha 6, Ayew 7. Subs: Benteke 5, McCarthy n/a.

Match Report

Inkhel tan a ni a, 16mins velah United hian chance tha tak an nei; Daniel James chuan hnai set sawt atangin goal-ah ball a chhuiha, mahse Van Aanholt chuan a lo dan saka, goal lo mahse chance tha tak erawh a ni chiang hle. Minute sawm hnu velah United chuan freekick an hmu a, Rashford chuan petin, hei pawh a goal teuh hle.

Darkar chanve khelh a ni a, rin loh zawk Palace lamin goal an khunga hma an hruai; Palace keeper Guaita chuan ball a pet chhuaka, Schlupp chuan a lu in Ayew lamah ball a pe phei thei hrama, a mah chauha awm Ayew chuan United goal lamah ball khalh pheiin ‘cool’ takin a pet goal zui. Ayew-a goal thun hma deuh lawka inhliam Shaw chu United-in goal an chhuah hnu chiahah lak chhuah a ni a, a aiah Ashley Young dah luh a ni.

Half time hma deuh lawkin United-in freekick an hmu leh a, Pogba chuan petin, pet chhe lem lo mahse a sang hret. First half-ah hian injury time minute nga lai pek belh a ni a, mahse goal luh belh awm tawh lovin, 1-0 in tihtawp a ni.

Second half tan a ni a, minute tlemte khelh a nihin United-in chance tha tak an nei nghal, veilama awm Young chu ball pek a ni a, Young hian tha takin ball cross lutin, Palace goal zawna United player awmte’n goal-ah an lo chan tir thei lo.

70mins khelh a nih hma hretin Milivojevic chuan an box chhungah McTominay ati tlu a, United hian penalty an hlawhchhuak. Penalty hi Rashford chuan petin, goalkeeper bum chiang hle mahse si ban a pet pera, United-in an si phurh sutna hun tha tak an neih chu an bawhpelh.

Rashford-a’n penalty a miss hnu lawk hian veilamah James chuan ball a khalha, a tlu zuia, mahse a tluk der avangin referee chuan yellow card a pe; James hian Palace an tum hma chiaha Wolves an hmachhawn tum pawhin dive avangin yellow card a hmu tawh a ni.

80mins khelh chhoh a ni a, Rashford chuan veilamah chak em emin ball a tlanpuia, Palace box chhungah a khalh lut, Rashford hi a tlu a, United lamin penalty hmuh an inbeisei viaua, mahse referee-in penalty pekna tlakah a ngai lo; VAR-a a lan danin referee thutlukna pawh hi a dik viau bawk.

United hi goal an khung lo tluan tawh mai dawn emaw tih hnuah James chuan 90mins hma lawkin an si phurh a suta,United hian mawi em emin one-touch pass an khel, box chhunga awm James chuan ball changin, mawi takin Palace goal-ah a chhuih luta, 1-1 a ni ta.

Injury time khelh a ni a, minute nga pek belh a ni. United hian ball chang hnem daih zawkin goal khunga chak ngei an tum hle a, Pogba chuan Palace half lamah ball a kawla, a inrin loh laiin ball chhuhsak a ni; Palace-in an counter nghal a, Van Aanholt chu ball pek niin Van Aanholt hian a chhaka awmWilfried Zaha pe in, Zaha hian box chhunga inpawt Van Aanholt a pe ve leha, Chelsea defender hlui Van Aanholt chuan near post lamah na takin a pet, De Gea chuan lo khawih mahse a dang zo lova, Palace hian hma hruai lehin an chakpui ta a ni. De Gea hian near post-a angle a khar tawk lo hle a, Van Aanholt hian pet tha mahse De Gea hian a chhuah ho a tih theih bawk awm e.