12 Oct 2018 03:15

inkhel

Cristiano Ronaldo record siam theih turte

Cristiano Ronaldo chuan record thahnem tak a siam tawh a, football khawvel tihausatu leh tihlutu a ni chiang a. Amah ang bawk hian Lionel Messi pawhin record a siam teuh tawh a, anni pahnih bik hian football khawvel chu an thunun chho ngar ngar rih a, inhnialna tawp thei lo a awm chhoh phah reng bawk a ni.

Ronaldo hian La Liga title 2, Copa del Rey trophy 2 bakah UEFA Champions League title te chu Bernabeu a chamchilh laiin a la hman a. Italian club lian Juventus a zawm hnuah record dang a siam belh theih an beisei hle a. Juventus a zawm hnua record thar a siam theih turte han tarlang ila.

1. Premier League, La Liga leh Serie A title la vek thei:
Football khawvelah Premier League title, La Liga title leh Serie A title la vek thei hi an la awm ngai lo a, hetiang ti thei tur hian Cristiano Ronaldo dinhmun a tha hle a. England leh Spain lamah title a lo la tawh a, tunah chuan a zawna Serie A title vawi 7 ngawt la thei Juventus a zawm tawh a, a tan chuan record thar siam hi a harsa dawn lo hle niin a lang.

2. Club pathuma Champions League title la thei:
Dutch star Clarence Seedorf chiah footballer zingah club hrang hrang pathuma UEFA Champions League title la thei a la awm a, Seedorf hian Ajax Amsterdam, Real Madrid leh AC Milan te chu European title hi a lakpui a. Hetiang ti thei tur hian Cristiano Ronaldo tan kawng a inhawng mek a, Manchester United leh Real Madrid te chu Champions League title a lakpui tawh a, Juventus a lakpui leh chuan club hrang hrang pathuma European title la thei pahnihna a ni thei ang.

3. Season khat chhunga Serie A goal thun hnem ber:
Serie A bikah season khat chhunga goal thun hnem ber record ding lai chu Juventus lama Ronaldo khelhpui mek Gonzalo Higuain siam a ni a, goal 36 a thun a. Cristiano Ronaldo chu Real Madrid tana goal thun hnem ber niin, goal 323 zet a thun a. Juventus tan pawh season khatah goal 36 aia tam hi a thun theih an beisei a ni.

4. Premier League, La Liga leh Serie A top scorer ni thei:
Footballer awm tawh zingah Premier League, La Liga leh Serie A top scorer ni vek thei an la awm ngai lo a, Cristiano Ronaldo chuan khawvela awm chhun nih theihna hun tha a nei tan mek a. Hetiang dinhmun hnaih thei berte chu league pahniha top scorer lo ni tawh pahnih - John Charles (Leeds United leh Juventus) leh Christian Vieri (Atletico Madrid leh Inter Milan) te an ni a. Cristiano Ronaldo hi 2007-08 khan Manchester United-a a khelh laiin Premier League top scorer a lo ni tawh a, Spain-ah chuan Trofeo Pichichi hi vawi thum (2010-11, 2013-14, 2014-15) ah te a ni tawh a ni.

5. Juventus tan inelna hrang hranga top scorer ni thei:
Italian club lian Juventus tan hian season khat chhunga inelna hrang hranga goal khung hnem ber chu Ferenc Herzer a ni a, 1925-26 season-ah khan Ferenc hian record a siam a, khum thei an la awm lo a. Ronaldo chuan Real Madrid tan khan inelna hrang hrangah goal 451 zet a thun hman a, a aia goal thun hnem an awm lo a. Tun hnai season 8 chhungin Ronaldo hian inelna hrang hrangah goal 50 a thun tling zel a, hei hi a chhunzawm theih zel chuan Herzer chu a khum thei dawn chiang a ni.