15 Sep 2018 12:02

inkhel

Cristiano Ronaldo chanchin an sawi

Vawi 5 ngawt Ballon d’Or chawimawina lo dawng tawh Cristiano Ronaldo chu FIFA Best Player award dawng thei tura chhawp chhuah zingah a tel a. Tun laia footballer tha berte zingah a hming sawi tel loh theih a ni lo a. Mi chi hrang hrangin a chanchin an sawi dan hi han tarlang ila.

“Ronaldo hian helai hmunah tih loh a nei tawh lo a. A duh chuan kan chenna khawvel hi chhuahsanin lei piah lam ram mi te a khelhpui thei tawh a ni.” - Alvaro Arbeloa. (Juventus laka bicycle kick mawi tak hmanga goal a thun hnua a sawi.)

“Cristiano hian engmah neih loh a nei lo. Kei hi tennis atchilhtu ka ni a, Cristiano hi Rafael Nadal ang vel a ni a, infiammi ropui zet mai, a thiamna chauha innghat mai lo, thawkrim em em reng mai a ni. Siamtu hnen atangin thilpek pathum hlu tak tak a dawng a, a pian tha em em mai te, a rilru paukhauh tak mai leh a taimakna te hi a thil thlawnpek dawn ropui takte an ni a. Football chanchin ropui sawi apiangin a hming hi a tel kumkhua tawh ang.” - Antonio Cassano.

“Kei ai chuan Cristiano hi a tha daih zawk a, kei pawh khan hun duhawm lo tak chu ka nei bik hran lo a. Ronaldo hi a hun laiah chuan player tha ber a ni chiang hle a, han hnaih thei hi an awm lo a ni.” - Zinedine Zidane.

“Thiamna hi chuan dinhmun sang takah min thlenpui thei chiang a, chutiang dinhmuna ding thei hi an lo awm nual tawh a. Rivaldo, Figo, Ronaldo leh Ronaldinho te kha an ropui hlawm hle a, an thleng sang hle bawk a. Mahse, anni kha chu kum hnih kum thum vel bak an vul vak lo a. Cristiano hi chu kum 10 chhung vel chu kum tin a chanchin sawi huai huai a la ni reng mai a, season khatah goal 50 a thun tling fo mai bawk a. Lionel Messi nen an hun lai a inang chiah hi a thatna chu Cristiano hian tan a la lehzual thin a ni. Muhammad Ali khan Joe Frazier a mamawh ang bawkin Federer hian Nadal a mamawh a, Larry Bird pawhin Magic Johnson a mamawh bawk a, chutiang zelin Cristiano pawh hian Messi hi a mamawh a. Pakhat zawk sawi dawn chuan an elpuite hming sawi tel ve zel a ngai fo thin.” - Rio Ferdinand.

“He pa hi chu a mihring lo tih hial chi niin ka hria a. A thil lo tih tawhte hi a ropui hlawm em em a, hemi piah lamah hian a inpekna mawlh mai hi a sang a ni. Inkhelh apiangin khelh mai mai a nei ngai lo a, theihtawp a chhuah thei zel a, a tang thei bawk a, inkhel zawh hian a hmai hi a sen vek zel. Ram leh club tan a thawh hlawk em em zel a, a hmeltha bawk nen, engkim a nei hi a ni ber a. Ka ngaihdan chuan Cristiano tluk thei tur hi an awm lo a ni.” - Louis Saha.

“Training naa ka goal thun aia tam daih hi inkhelh tak taknaah a thun thei a ni.” - Sandro Wagner.

“Player ropui tak a ni a, a team in an mamawh chuan a rawn lang mai a. ‘El Flaco’ Cruyff hnuah player ropui tak, thiam chungchuang hi an awm leh ta meuh lo a, Cristiano Ronaldo hi a ni leh deuh tawp mai a ni.” - Diego Maradona.

“Khawvela footballer ropui ber nia inngaih theihna chhan tur hi a nei tha em mai a, chutianga inngai tur pawh a ni. Thil ropui tak tak a hlen chhuak tawh a, a thil lo tih tawhte hi khawvela footballer ropui ber berte record aiin a chungnung tawh zawk a ni.” - Ronaldo.

“Goal hmaah chuan khawl ang hlauh a ni a, sawisel bo a ni ber a. Striker zingah Ronaldo anga duhthusam hi an awm lo a. Ke dinglam, ke veilam leh lu hmangin a tha em em vek mai a, a tih apiang hi a hnehsawh em em vek mai a ni ber.” - Jerome Boateng.

“Khawvela football player tha ber a ni a, a taimain a thawkrim em em bawk a. Training-naah te hian a thleng hmasa ber a, a haw hnuhnung ber zel a. Hetiang taka inpe hi ka la hre ngai lo a ni.” - Blaise Matuidi.