Cristiano pawngsual chungchang kha sawi an phal ngai lo: Ekroth

23rd July 2019, 03:07AM

Petronella Ekroth chuan Juventus hmeichhe team te chu Cristiano Ronaldo pawngsual chungchang kha sawi chhuah an phalsak lo thin tih a sawi chhuak.

Swedish defender Petronella Ekroth chuan season khat chhung chu Juventus hmeichhe team-ah a khel a. Italian club-a a khelh lai hian Cristiano Ronaldo thubuai chungchang kha sawi an khap tlat avangin chet a intih thu a sawi.

Kum 29-a upa Ekroth hian Serie A champion team-ah season khat chu a khel hman a, season tawp hnuah Sweden lamah a kir leh tawh a. Italy rama a awm zui loh chhan pakhat chu a duh dan leh a ngaihdan chuan ngaihpawimawh a hlawh loh em vang niin a sawi a ni.

Ekroth chuan, “Ronaldo chungchang kha sawi chhuah an phal ngai miah lo a, mi bulah mai ni loin player te pawh khan kan sawiho ngam ngai lo a. Thil dang buaipui loin club duh anga awm kha kan tih tur a ni tawp mai a. Khatiang inkaihhruaina kha chu a hrehawm a, kan khawvel a zim viau a, kan ngaihdan kha engah vak mah an ngai lo a ni ber,” a ti.

Juventus-ah chuan an chep viau nia a ngaih thu sawiin, “Ka ngaihdan chuan thil dik lo leh tha lo nia kan hriatte chu kan sawi chhuak thei tur a ni a. Juventus-ah khan chutianga tih chu a theih loh a, kan ngaihdan sawi kha a rem lo deuh zel a ni,” a ti.

A sawi zelnaah, “A nihna takah chuan club inkaihhruai dan kha ka rilrem zawng a ni lo viau a, tan ina awm nen te ka intehkhin deuh rum rum thin a. Ka tan chuan thil dik lo nia ka hriat chu sawi chhuah zel a tha a, ka ngaihdan chu ka dinpui tlat zel bawk a ni,” a ti.

Tunah chuan Petronella Ekroth hian Juventus chhuahsanin a club hlui Djurgardens chu a zawm leh tawh a, hei bakah hian TV pundit angin a awm tel dawn bawk a ni.

Portuguese superstar Cristiano Ronaldo hi American hmeichhe pakhat chuan 2009 khan Las Vegas khawpuia hotel pakhatah a pawngsual niin a puh a. Juventus star hian pawngsuala puhna hi a pha nasa hle a, heti chung hian kumin June thlaah khan thubuai an ziak lut thar leh a ni.

Pawngsuala puh a nih chhoh hnu hian Juventus chuan Cristiano Ronaldo an thlawp thu an chhuah a, kum 10 kaltaa thil thleng nia an sawi avang hian an forward chu an duh loh phah loh thu an tarlang a ni.

October 4, 2018 khan Juventus chuan khi thu chhuah khi an puangzar a, hemi hunah erawh chuan Cristiano Ronaldo chungchang hi engmah an sawi chhuak leh tawh lo a ni.

Copyright © inkhel.com 2024. All rights reserved.