Cristiano nen min khaikhin hi a lawmawm: Rashford

14th December 2019, 08:12PM

Marcus Rashford chuan Cristiano Ronaldo nen an khaikhin chu lawmawm a tih thu sawiin, tunah erawh Portuguese star tluk pha tur chuan kawng thui tak zawh a la ngaih thu a sawi.

Manchester United manager Ole Gunnar Solskjaer chuan Etihad Stadium-a Manchester City an hneh hnuah khan Marcus Rashford chu a fak hle a, Cristiano Ronaldo nen khaikhin mai a awl thu a sawi chhuak a ni.

Rashford hian Ronaldo aiin Manchester United tana goal 50 a thun rang zawk a, hetiang zat goal thun tur hian game a mamawh tlem zawk a ni.

“Forward player ka ni a, kan chet dan apiang miin an lo thlir ngun hle a, kan hmaa forward lo awm tawhte nen hian min khaikhin deuh zel bawk a. Hranghlui player tha tak takte nen khaikhin ralah chuan keini chu engmah kan la ni ve lo,” tiin Rashford chuan a sawi.

“Kan tih theih ber chu khelmualah theihtawp chhuah a, tha taka khel thei tura tan lak a ni a, mipui lampangin an ngaihdan an lo sawi ve thung thin a. Hetiang hi chu forward zawng zawngin an tawng ve vek a, thil nih ve dan tur hrim hrim a tih theih,” a ti bawk.

A sawi zelnaah, “Tunah pawh Cristiano Ronaldo nen min khaikhin ve deuh hi a lawmawm ka ti hle a, chutih rualin anni ang player ropui dinhmuna ding ve thei tur chuan ka tan kawng zawh thui a la ngai hle,” a ti.

Tun season kal mekah Rashford hi a che tha chho hle a, tun hnaia game 14 khelhah goal 13 ngawt mai a thun thei a. Hetiang taka a chet that chhoh rual hian England forward chuan Manchester United in title lak an neih loh chuan a goal thun te chuan awmzia an nei thui vak dawn lo niin a sawi chhuak.

“Goal thun vak vak ila, Manchester United hian eng title mah la lo ila, awmzia a awm vak lo ang. Trophy lak hi kan tum ber a ni a, chu aia hlu chu a awm lo a ni,” a ti.

Copyright © inkhel.com 2024. All rights reserved.