25 Mar 2020 04:39

inkhel

Cristiano leh Messi te aiin ka tha zawk: Pele

Pele chuan tunlaia inhnialna tawp thei lo chungchangah a ngaihdan a sawi chhuak a, Lionel Messi leh Cristiano Ronaldo te pahnih aia tha a nih thu a sawi bawk.

Brazilian legend Pele chuan inhnialna tawp thei lo chungchang sawi chhuakin, Cristiano Ronaldo chu Lionel Messi ai chuan tha a tih zawk thu a sawi chhuak a. Anni pahnih hi mi chi hrang hrangin tha zawkah an puang ve ve a, inhnialna tawp thei lo langsar tak a ni.

Ronaldo leh Messi te hi an tha dun bawk a, an pahnih ringawt hian Ballon d’Or chu vawi 11 an la tling tawh a. Portuguese superstar hian vawi 5 a la tawh a, Argentine superstar hian vawi 6 a la tawh bawk a ni.

Messi chu khawvela footballer zinga Ballon d’Or dawng ngun ber ni mah se vawi thum ngawt World Cup champion lo ni tawh Pele chuan Cristiano chu a tha zawkah a thlang tho a ni.

“Tunlaia footballer tha ber chu Cristiano Ronaldo hi a ni a. A tha ka tih zawk chhan chu chet chhiat em em a nei vak ngai lo a. Chutih rualin Lionel Messi pawh hi dah hniam theih a ni lo a, a tha em em a, striker erawh a ni lo thung,” tiin Pele chuan a sawi.

Kum 79-a upa Pele hian Cristiano leh Messi te chu player tha em em mai an ni tih sawiin, an hun hma hian player ropui tak tak an lo awm teuh tawh tih pawh a sawi a. Chutianga player ropui tak tak awm tawh zingah chuan amah tluka tha an awm loh thu a sawi a ni.

“Footballer awm tawh zawng zawnga tha ber thlan chhuah chu thil harsa ve tak mai niin ka hria a. Zico, Ronaldinho, Ronaldo te kha an ropui em em a. Europe khawmualpui lamah pawh Franz Beckenbauer leh Johan Cruyff te pawh an awm bawk a. Tu te pawh hi a tha bera thlan tlak chu an ni chiang mai a, chutih rualin kei aia chungnung thei tur hi chu an awm loin ka hria,” tiin a sawi.