Juventus chuan UEFA Champions League quarter final second leg-ah Cristiano Ronaldo chu an chhawr thei dawn a, coach Massimiliano Allegri chuan lawmawm a tih thu a sawi nasa hle.

Cristiano Ronaldo chuan Amsterdam khawpuia first leg an khelh tumin Juventus tan goal a thun a, an mikhualna ramah point 1 an va hlawh chhuak thei a. Zanina Ajax nen quarter final second leg an khelh hunah Juventus captain Giorgio Chiellini leh Mario Mandzukic te chu an tel thei dawn lo a, Ronaldo ho hian an tal vel dawn a ni.

Massimiliano Allegri chuan, “Kan team-a Cristiano Ronaldo a awm hlauh hi chu a lawmawm tak zet a, kan khingpui tur team lamah a awm ang tih hi a hlauhawm hluah hluah a ni,” a ti.

“Cristiano thiamna hi mi nazawngin an nei ve lo a, mi aia chungnung a nih zia hi a lang chhuak leh nge nge thin a. Eng emaw chang hi chuan dan beh theih loh khawpa player tha a ni tih hi a lantir thin a, a hmel en hian a chiang mai zel a ni,” a ti bawk.

A sawi zelnaah, “A taksa lah hian hma a sawn tial tial a tih theih a, a thiamna te, a thatna te hi a hma zawng aiin a zual zel thin niin a hriat a, a khelh tam poh leh a thatna hi a pung emaw tih mai tur a ni thin a. A inkhelh apiang hian player dang daih hi a ni thei deuh zel bawk a ni,” a ti.

Juventus coach chuan defender Giorgio Chiellini awm dawn lo mahse vawi nga ngawt Ballon d’Or lo dawng tawh Cristiano Ronaldo chu captain nihtir a tum loh thu a sawi a. “Captain atan Ronaldo maw? Paulo Dybala a inkhel thei a nih chuan Dybala chu captain a ni ang a, a nih loh chuan Leonardo Bonucci hi a ni ang,” a ti.