14 Feb 2020 04:50

inkhel

Cristiano ka khelhpui chak, Messi a ropui ber: Rakitic

Barcelona midfielder Ivan Rakitic chuan Juventus superstar Cristiano Ronaldo khelhpui a chak thu a sawi chhuak.

Ivan Rakitic hi Camp Nou lamah a nghet lo tial tial niin an sawi a, a dinhmun a chiang tawh lo hle a. January transfer window inkhar hma khan Serie A club pahnih Juventus leh Inter Milan nen pawh an sawi zawm nasa hle a. Premier League club lian Manchester United pawh an sawi lang hman bawk a ni.

Season tir lamah khan Barcelona chuan Paris Saint-Germain atangin Neymar chu Camp Nou lama lak kir an duh a, hetiang tur hian Barca chuan Ligue 1 champion hnenah Ivan Rakitic chu an zawrh tel niin thu thang a awm a ni.

Hemi hnuah hian Rakitic hi an sawi ri ta zeuh zeuh a, Italian champion Juventus nen pawh an sawi zawm nasa a. Hetiang karah hian vawi nga ngawt Ballon d’Or lo dawng tawh Cristiano Ronaldo nen khelh dun a duh leh duh loh an zawhna chhangin, a duh thu a sawi chhuak a ni.

Kum 31-a upa Rakitic chuan, “Cristiano Ronaldo khelhpui theih chu ka chak khawp mai a. Football chanchinah chuan player ropui ber pawl a la ni a, chu vangin khelhpui chu thil chakawm tak mai a ni a. A inkhel en vel pawh hi a hmuhnawm ka ti a, Juventus-ah pawh a che tha chho hle a ni,” a ti.

Ronaldo nena khelh dun a chak thu a sawi rual hian Barcelona captain, Ballon d’Or pawh vawi ruk dawng thei Lionel Messi chu footballer ropui ber nia a ngaih thu a sawi thung.

Rakitic chuan, “Football huang chhungah hian player ropui tak tak an awm teuh tawh a, tun hnai kum 15 chhung hi chuan Lionel Messi aia tha leh ropui hi an awm loin ka hria,” a ti.

“Messi bula khelh hi a nuam a, a danglam hle a. A bulah kum ruk vel bawr chu ka khel ve ta a, hun ropui tak tak ka tawng hnem hle a ni,” a ti bawk.