Cristiano-a’n a contract zawh hmaa chhuah a duh

19th April 2019, 03:04AM

Cristiano Ronaldo chuan Juventus tana contract a ziah chu hman tluanchhuah a tum lo niin an sawi.

Portuguese superstar Cristiano Ronaldo chuan European champion Real Madrid chhuahsanin Italian champion Juventus a zawm a, tun season-ah UEFA Champions League atanga hnawh chhuah an ni tawh a, hei vang hian Ronaldo pawhin hmun dang pan a duh phah niin thawm ri a awm a ni.

Juventus a zawm hnuah Ronaldo chu player pawimawh ber pawl a ni thei nghal a, Serie A ah chuan goal thun hnem pawl niin, mi goal thun tur siam hnem pawl a ni bawk a. Tun season chhungin Cristiano hian goal 19 a thun tawh a, mi goal thun tur hi vawi 9 a siamsak tawh bawk a. A chet fuh zarah Bianconeri chuan Serie A ah hma an hruai fal hle a, anmahni hnaih bertu Napoli aiin point 17 ngawtin an sang tawh a ni.

Champions League lamah Cristiano Ronaldo chuan a tangkai zia a lantir a, round of 16 second leg-ah Atletico Madrid nen an inkhelh tumin hattrick a siam a, Old Lady chu quarter final a thlenpui theih phah a. Ajax nen quarter final an khel a, first leg leh second leg-ah Ronaldo hian goal a thun ve ve a, mahse semi final erawh an kai thei ta lo thung.

Tun hnai season 9 chhung chu Cristiano Ronaldo hian Champions League semi final a la lut ziah a, tun season-a Juventus a zawm hnuah chuan a chhunzawm thei ta lo a. Juventus chuan Champions League title lak an duh avangin Cristiano Ronaldo hi €100 million chuang zet sengin an la lut a, mahse tun season-ah chuan an thil beisei hi an kutah a awm thei dawn ta lo a ni.

Serie A title chu bel chhunga sa a ni ber tawh a, tun hnai season li chhung double title an lo lak tawh pawh tun season-ah chuan an la thei dawn ta lo a, Coppa Italia quarter final-ah Atlanta chu an hneh lo a ni.

An beisei aia hmaa Champions League atanga an tlak takah chuan Ronaldo chu a thinrim hle niin Italian chanchinbu AS chuan an tarlang a. Ronaldo hian Old Lady tan hian 2022 thleng contract ziak mahse hemi zawh hma hian hmun danga kal daih a thlang thut thei niin an tarlang bawk a ni.

Copyright © inkhel.com 2024. All rights reserved.