Kaka chuan tunlai football khawvelah Lionel Messi chu chungnung a tih ber thu sawiin, Cristiano Ronaldo aiin a ropui zawk niin a sawi.

Argentina star Lionel Messi leh Portugal star Cristiano Ronaldo te chuan kum 10 chuang zet chu football khawvel an awp tawh tiin a sawi theih a. Footballer tana chawimawina ropui Ballon d’Or pawh an la hnem dun hle a, Messi hian vawi 6 la tawhin footballer zinga la hnem ber a ni a, Ronaldo chuan vawi 5 a la tawh bawk a ni.

Anni pahnih hi khawvela footballer ropui ber tia sawi ve ve an ni a, a tha zawk nihtir tum hian football ngainatute chu an inhnial nasa hle a, inhnialna hi a tawp thei meuh lo a. Messi leh Ronaldo te hian tha titu hi thahnem tak an nei ve ve a, an inhnialna atang hi chuan a chungnung zawk hi thlan thiam a har hle.

Brazilian star hlui Kaka chuan player pahnihte inkarah Messi chu ropui a tih zawk thu sawiin, 2007 Ballon d’Or dawngtu hian Real Madrid-ah pawh a lo khelhpui tawh Cristiano Ronaldo chuan Barcelona captain hi a tluk lo niin a sawi chhuak.

“Cristiano hi chu ka khelhpui ve tawh a, a tha ka ti em em mai a. Player tha deuh mai a nih tho rual hian a aiin Lionel Messi hi tha ka la ti zawk,” tiin Kaka chuan a sawi.

“Lionel Messi hi player ropui deuh mai a ni a, a thiamna hi sawi fiah thiam a harsa zawk hialin ka hria a. Khelmuala a che vel hi a dik em em mai a, sawisel tur hi a awm meuh lo a ni ber mai,” a ti bawk.

Cristiano Ronaldo chungchangah Kaka chuan, “Cristiano hi khawl ang mai a ni a, a chak a, tharum a ngah a, a che rang em em bawk a, a rilru a paukhauh hle bawk a ni,” a ti.

“Ronaldo hian inkhelh reng mai a duh a, chak theih zel duh mi a ni bawk a. Khawvela a tha ber ni thei tur chuan chutiang chu a pawimawh berin ka hria a. Football chanchinah hian Messi leh Cristiano te hming hi a dai thei tawhin ka ring lo a, a tha zual panga thlan chhuah zingah chuan an tel ve ve turah ka ngai a. An pahnih inkhel ka hmu ve thei hi a lawmawm a, vannei ka inti hle a ni,” a ti bawk.