ICC Men’s Cricket World Cup 2019 chu Pathianniah an khel zo ta a, final hmuhnawm tak maiah England chuan New Zealand an hneh thei hram a, a vawi khatna atan World Cup trophy an la ve thei a ni.

League match 45 an khel a, semi final vawi hnih khelh hnuah final vawi khat an khel leh a, July 14 ah khan Lord’s ah England chu a vannei zawkah an tang ta a. Eoin Morgan kaihhruai England chuan boundary an neih hnem zawk avangin chaka puan an ni a, four vawi 22 an vuak laiin New Zealand chuan vawi 17 chiah an vua a, hei vang hian trophy hi an lak theih phah a ni.

Ni 40 chhung World Cup an khelh lai khan chanchin chi hrang hrang a inpawlh hnem hle a, lawmna te, lungawi lohna te, thinrimna te a inchawhpawlh nuaih hlawm a. Kumina World Cup an khelhah khan record thar pawh an siam nual a, chutiang zinga langsar zual thenkhat han lawr khawm ila.

1. Rohit Sharma leh KL Rahul te chuan phek thar an kai a, World Cup bikah India opener zinga run siam hnem ber niin, vawi hnih ngawt record an siam hman.

2. Jofra Archer chuan wicket 20 zet a la hman a, England bowler zingah chuan World Cup-a wicket la hnem ber a ni.

3. Bangladesh chuan Australia nen an inkhelhin run 333 an siam a, mi 8 an out a, ODI bikah chuan run an siam hnem ber tum a la ni.

4. Rohit Sharma chu batsman zingah World Cup vawi khata hundred vawi 5 vaw chhuak thei hmasa ber a ni a. A hmaa hundred vawi 4 vaw chhuak thei Kumar Sangakkara record chu a khum a ni.

5. Kane Williamson chuan kumin World Cup-ah khan run 578 a vaw chhuak hman a, New Zealand batsman zingah chuan ODI run siam hnem ber a ni a, World Cup captain zingah pawh run vaw chhuak hnem ber a nih a rinawm.

6. Shaheen Afridi chu bowler zingah World Cup-a wicket 5 la tling thei naupang ber a ni a. Bangladesh nen an inkhelh khan Pakistani bowler hian wicket 6 lain, hetih lai hian kum 19 leh ni 90-a upa a ni a. Lord’s bikah pawh ODI ah chuan wicket la hnem ber a la ni.

7. England chuan Afghanistan nen an inkhelhin run 397 zet an siam a, World Cup bikah chuan run an siam hnem ber tum niin, World Cup 2019 hrim hrimah pawh run siam hnem ber an ni.

8. Eoin Morgan chuan England leh Afghanistan inkhelhin six vawi 17 ngawt mai a vua a, World Cup innings bikah chuan six vaw chhuak hnem ber a ni a. England chuan six vawi 25 an vaw chhuak a, ODI bikah chuan six vaw chhuak hnem ber record an siam.

9. Virat Kohli chu World Cup bikah team captain zinga a zawna half century vawi 5 siam thei hmasa ber a ni.

10. Shakib-al-Hasan chuan run 606 a siam hman a, Bangladesh batsman zingah chuan World Cup a run siam hnem ber a la ni.

11. Avishka Fernando chu Sri Lanka tana World Cup-a century siam thei naupang ber a ni a. West Indies laka run 104 a vuak chhuah khan kum 21 leh ni 87-a upa a ni.

12. Lasith Malinga chu World Cup-a wicket 50 la rang ber niin, World Cup match 26 khelhah wicket 50 hi a la tling hman a ni.

13. Afghanistan wicketkeeper Ikram Ali Khil chu World Cup wicketkeeper ni thei naupang ber niin, a match khelh hmasak bera New Zealand a hmachhawn khan kum 18 leh ni 252-a upa a ni.

14. Carlos Brathwaite chu West Indies batsman zinga World Cup century siam rang ber niin, New Zealand lakah ball 80-ah run 100 a vaw chhuak thei.

15. Imran Tahir chu World Cup bikah South Africa tana wicket la hnem ber niin, World Cup-ah wicket 40 a la tawh a ni.

16. Nathan Coulter-Nile chuan West Indies lakah run 92 a siam a, World Cup bikah chuan No. 8 batsman zinga run siam hnem ber a ni.

17. England batsman pahnih - Jason Roy leh Jonny Bairstow te inkawp chu World Cup bikah century vawi 4 vaw chhuak thei hmasa ber an ni a. A hma chuan pair 5 in century vawi 3 an lo vaw chhuak tawh a ni.

18. Joe Root chuan run 556 a siam a, England batsman zingah chuan World Cup vawi khata run siam hnem thei ber a ni.

19. Mitchell Starc chuan World Cup vawi khata wicket la hnem ber record a siam a. Australian pacer hian tun tumah khan wicket 27 a la a, 2007-a Glenn McGrath record siam, wicket 26 chu a khum chiah a ni.

20. Joe Root chuan World Cup-ah fielder zinga ball man hnem ber record a siam a, tun tumah khan vawi 13 ngawt a man.

21. MS Dhoni leh Ravindra Jadeja te’n New Zealand laka run 116 an vaw chhuak kha World Cup bikah wicket 7-naa run vaw chhuak hnem ber record a ni.

22. New Zealand wicketkeeper Tom Latham khan World Cup bika mi out tir hnem ber record ding lai a nihrual.

23. Ben Stokes chuan final-ah khan run 84 a siam a, England batsman zingah chuan World Cup final-a run siam hnem ber a ni.