PV Sindhu chuan coronavirus darh mek dona kawnga hman atan Rs. 10 lakhs lai a thawh.

World champion shuttler PV Sindhu hian Telangana leh Andhra Pradesh Chief Minister’s Relief Fund ah Rs. 5 lakhs ve ve a pe a, a pawisa thawh hi COVID-19 darh mek dona atana hman tangkai turin a ti a ni.

India ramah pawh COVID-19 vanga buai an pung tial tial a, he hri leng kai hi mi 600 chuangin an kai tawh a, mi 13 chuan nunna an chan phah tawh bawk a. Khawvel pumpuiah he hri leng vanga nunna chan hi mi 21,000 chuang zet an ni tawh a ni.

Sindhu chuan, “COVID-19 dona atan hian Telangana leh Andhra Pradesh Chief Ministers Relief Fund ah Rs. 5,00,000 ve ve ka thawh e,” tiin Twitter lamah a tar lang.

Telangana hi 2014 ah khan Andhra Pradesh atanga an pawh then niin, Hyderabad shuttler Sindhu chuan tun laia hri leng mek hi a vei hle a, helai hmun hniha hma an lakna pui thei turin a pawisa hi a thawh ve a ni.

COVID-19 vei hi khawvel pumah chuan mi maktaduai 4 chuang an tling tawh a, a darh chak em avangin infiamna chi hrang hrang pawh a tibuai hneh hle a, an chawlh phah thup a. Tokyo Olympics pawh kum thar atan an sawn hla hial a ni.

Rio Olympics a silver medal lo la tawh PV Sindhu chu Tokyo Olympics ah hian tel tura tling chiang tawh niin, a vawi hnihna atan Olynpics-a tel leh tur chuan kum thar a nghah thlen a ngai dawn a ni.