MC Mary Kom chuan Thawhtanniah khan Rajya Sabha MP a nihnaa a thla khat hlawh chu COVID-19 dona atan a pe dawn tih a sawi.
Vawi ruk ngawt world champion ni thei Mary Kom hi Rajya Sabha MP niin, MP hlawh hi thla khatah Rs. 1 lakh a ni a, hei hi coronavirus dona atana hman turin Prime Minister’s Relief Fund-ah a thawh dawn a ni.
Mary Kom chuan, “COVID-19 vangin kan ram a buai chho ve mek a, he hri leng dona atan hian PM National Relief Fund-ah ka thla khat hlawh hi ka thawh duh a ni. Ka account atangin he hri leng dona atan hian ka thla khat hlawh Rs. 1,00,000 chu ka pe ang,” tiin a sawi.
Manipuri boxer hi Commonwealth Games leh Asian Games champion te pawh niin, 2016 kumah khan Rajya Sabha MP hi a ni.
A thla khat hlawh Rs. 1 lakh a thawh dawn bakah hian Ministry of Statistics and Programme Implementation atanga MPLADS installment tur Rs. 1 crore tih chhuah chu a remti bawk a ni.
Tun hnaiah khan Mary Kom hi Olympic Games a tel thei turin a tling a, chutih rualin hri leng vangin Tokyo Olympics chu 2021 a neih tura sawn hlat a ni thung a. Khawvel hmun hrang hrangah he hri leng mek hian infiamna a tibuai nasa hle a, infiamna chi hrang hrang chu an chawl thup mai a ni.