Kolkata club lian East Bengal chuan COVID-19 darh mek dona atan an state sorkar hnenah Rs. 30 lakh an thawh dawn.

India ramah coronavirus chu a darh mek zel a, mi thiamte chuan theihtawp chhuahin do let hna an thawk nasa hle a. He hri leng do letna kawnga tha thawh ve lem lo pawhin sum leh pai an lo thawh ve zel bawk a. Hetianga sum thawh zingah hian East Bengal pawh an tel ve dawn a, Rs. 30 lakh an thawh tur thu hi an puang a ni.

Hri leng dona kawngah hian Kolkata khaw chhunga infiamna peng hrang hrangte chuan theihtawp an chhuah ve hlawm a. Tun hnaiah khan I-League champion, East Bengal hmelma club Mohun Bagan pawhin Rs. 20 lakh an lo thawh ve tawh bawk a ni.

Tun hnaiah an sum dinhmun fuh vak lo mah se East Bengal chuan pawisa thawh ve ngei an duh thu hi sawiin, Indian Super League khel tura sponsor an zawn lai mek hian Rs. 35 lakh vel chu an tuak ngah theih an beisei thu an sawi chhuak.

East Bengal thuneitu sang pakhat Nitu Sarkar chuan, “Kan state chhunga COVID-19 dona atan hian sorkar hnenah Rs. 30 lakh kan thawh dawn tih kan titlu tawh a, tun atanga ni rei vak loah hian chief minister Mamata Banerjee hnena hlan kan tum,” tiin a sawi.

“Maidan velah hian kan club hnuaia thawktu hrang hrang, helai hmuna mi ni lem lote chu kan awmtir a, an ei turte pawh kan ngaihtuahsak vek a. Club te chu hri leng karah an inkharkhip vek a, hun harsa kan hmachhawn mekah hian thawktute dinhmun hi a ngaihtuahawm em em a, hei vang hian theihtawp chhuahin kan enkawl mai a ni,” a ti bawk.