Coutinho a phur

27th June 2015, 11:06PM

Philippe Coutinho chuan a khelh mekna Liverpool-in Roberto Firmino an lalut chu lawmawm a ti a, an hlawhtlinpui a ring tlat bawk.

Firmino hian Hoffenheim chhuahsanin Merseyside club hi tunkar tir lam khan a zawm fel a, a club thar turah hian Brazil national team-a a khelhpui Coutinho hi a awmsa a, a mikhual lutuk lovin a rinawm.

Inter Milan midfielder hlui Coutinho chuan, "Chanchintha lam niin ka ngai. Firmino hi player tha a ni a Brazil national team atanga hria ka ni. Mi nun dik leh fel a ni a, a chakin a rang a ball a thiamin goal pawh a khung hnem thei."

"Forward tha tak a ni tel a season tharah kan tangkaipui dawn tih hi ka chiang. A chanchin ka hriat hnu khan, 'Welcome to Liverpool' tiin ka lawm a, chhungkua ang mai khawsa club-ah a awm dawn tih ka hrilh tel bawk a, Liverpool-a a season hmasa berah tha tak leh hlawhtling taka a khelh theihnan duhsakna pawh ka hlan." tiin a sawi.

Tun nipui transfer hun hawn mekah Liverpool hian player thar panga an nei tawh a, Firmino hmaah hian James Milner, Danny Ings, Adam Bogdan leh Joe Gomez-te an lo lalut tawh a ni.

Copyright © inkhel.com 2024. All rights reserved.