Philippe Coutinho chuan a nghetin Vasco da Gama a zawm ta tih Aston Villa chuan an tarlang.
Kum 33 mi hian season liamta kha Brazil club-ah hian loan-in hun a hmang a, Vasco da Gama leh Villa te chuan inremna nei chhunzawmin, a nghetin Coutinho chuan Brazil club hi a zawm ta a ni.
Kum 2022 January thla khan Countinho hian Barcelona atangin loan-in Aston Villa a pan a, khatih laia Villa manager kha Steven Gerrard kha a ni. A nghetin Villa chuan Countinho hi an la chhunzawm a, kum 5 chhung atan contract an ziahpui a, a man kha £17m vel nia report a ni a, kar khatah £135,000 ($184k) hlawhin, Villa player hlawh hnem ber pakhat a ni.
English club tan Coutinho hian game 43 a khel ve hman a, goal 6 khungin assist vawi 3 a nei. Villa tana a inlan hnuhnun ber chu August 2023 kha niin, 4-0 a Everton an hneh tum khan minute 20 a khel ve. 2023-24 sason khan Qatari club Al-Duhail lamah loan-in a kal.
A chawrchhuahna chu Vasco de Gama niin, kum 16 mi a nih laiin Inter chuan kum 2008 khan an la. Brazil club-ah hian loan-in kum 2 chhung hun a hmang leh te te a, kum 2010 khan Italy a pan a, Italian club-ah game 47 a khel a, kum 2012 khan Espanyol chuan loan-in an la leh.
Inter-ah inkhelhna hmun a chan tam loh laiin kum 2013 January thla khan Liverpool chuan an la lut a, Brendan Rodgers leh Jurgen Klopp te a hrawn chho a, English club tan hian game 201 a khel a, goal 54 khungin, assist vawi 44 a nei.
Liverpool-ah hun duhawm tak a hmang, Ballon d'Or dawng theih khawp hiala thiamna leh theihna nia an sawi kha Barcelona chuan kum 2018 January thla khan £142m laiin an lei hem mai. A season hmasa berah La Liga a chawi a, a kum lehah pawh an champion nawn bawk.
2019-20 season khan Bayern Munich lamah loan-in a kal a, Champions League-ah Barcelona a hmachhawn a, goal hnih a khung a, 8-2 laiin an hneh a nih kha. Final-ah PSG chu si khat faiin an hneh leh a, UCL no mawi a chawi.
Barcelona lamah a kir leh a, mahse a inhliam chho a, 2020-21 season chawhnu pumpui a chawl. Barcelona-a a kir leh hnuin game 16 a khel a, Villa a zawm ta a ni.