Nikum nipui laia Chelsea atanga Real Madrid zawm tu Thibaut Courtois chuan Chelsea-a a thianpa Eden Hazard nena Real-a khelh dun chu a nawm tur thu a sawi.

Begian goalkeeper Courtois hi Chelsea lamin ui hle mahse nikum khan Real hi a pana, a thianpa Hazard pawh hi Real hian lak tum hle mahse Hazard erawh Chelsea-ah a cham chhunzawm.

Courtois leh Hazard-te hi Chelsea tan kum eng emaw zat an khel duna, Belgium tan pawh khel dunin an inkawm ngeih hle. Courtois leh Hazard-te hian team khata khelh dun zel an duh thu an lo sawi tawh thin a, Hazard hian Real pan a chak thu a sawi fo tawh bawk nen, Hazard hian Real hi a pan mai lovang tih a sawi theih loh.

Kum 2018 World Cup Golden Glove winner chuan, “Hazard-a’n Real a rawn zawm ve a nih chuan a nuam ka ti dawn a, mahse chu bak chu sawi belh tur vak ka hrelo. Hazard-a thutlukna siam tur a ni a, Madrid lam pawh hian Hazard hi an duh leh duh loh an chungchangah thutlukna an siam a ngai ve bawka, chulam chu keichuan engmah ka hrelo.

“Eden hi player tha em em a ni a, ka thian tha tak a ni bawk. Real-ah min rawn zawm a nih chuan a nuam dawn a, mahse a duhthlanna a ni.

“Hazard nen hian kan titi dun fo va, Real-a lokal a tum leh tum loh lam erawh kan sawi ngai lem lo. Khelh dun kan chak thu sawiin kan nui dun thin a, chu bakah chuan ka inrawlh lem lo. Season tawpah eng nge thleng dawn kan hre chauh anga, mahse Eden hi chu player tha chungchuang a ni,” a ti.