Coronavirus vangin Pro Volleyball League thulh a ni

12th March 2020, 08:03PM

Khawvel pum leh India rama coronavirus darh mek avangin April-a khelh tura ruahmanna siam tawh 2020 Pro Volleyball League chu thulh a ni.

Ningania Organising Committee thu khawm chuan "thu leh awm hma chuan" thulh ni se tiin thutlukna a siam a, boruak awm dan azirin ngaihtuah that leh a ni ang.

Mizoram volleyball inelna sang ber hi R Dengthuama Indoor Stadium-ah April tir atanga May tir thlenga khelh tura ruahmanna kalpui a ni a, kawng hrang hrangah inbuatsaihnain a vawrtawp a thleng chho mek.

Hrilengin khawvel pum leh Mizoramah harsatna lian tak a thlen chho zel a, inpuahchahna chhunzawm thei lova thulh a ngai ta chu Organising Committee chuan pawi a tiin a kaihhnawih zawng zawng hriatthiamna a ngen nghal bawk.

Mizoram Chief Secretary hovin State Level Force on Mitigation of Coronavirus chuan thawhlehni khan mipui vantlang kal khawmna reng reng buatsaih lo turin a lo rel tawh a ni.

Ninganiah Mizoram State Sports Council chuan thuchhuah siamin an hnuaia state level association bakah district hnuaiah district sports association leh club-te chu sports championship emaw tournament emaw seminar emaw conference emaw pawh ti tura hmalakna kal lai a awm a nih pawhin thulh vek turin a hriattir.

Tournament kal laklawh a awm a nih pawhin player leh technical official tlem te bak entu mipui awm phal a ni lo. Sports Council enkawl indoor stadium leh inkhelhna hmun hmang tura tihfel sa zawng zawng pawh hnuhkir leh vek a ni dawn a, tournament leh championship buatsaih nan hmantir a remchang dawn lo a ni.

Copyright © inkhel.com 2024. All rights reserved.