Inter Milan-in Europa League Round of 32 second leg inkhela Ludogorets an mikhual hunah coronavirus avangin entu an awm dawn lo.

Italy hmar lam (Northern Italy)-ah hian coronavirus a leng nasa zual niin a langa, Italy hmar lam hi Europe-ah chuan coronavirus hlauhawmna ber niin tarlan a lo ni tawha, hemi avang hian Ludogorets pawhin San Siro-a an len luh tur chunchangah UEFA hnenah entu awm lova inkhelh an dila, an dilna hi a hlawhtling ta a ni.

Italy sawrkar pawhin coronavirus hi a darh zel loh nan Serie A game thenkhat chu an khelhna hmun tura zirin entu lova inkhelh tir an tum mek nia sawi niin, thuchiang zawk puan a nih thuai a rinawm.

Inter Milan hian Bulgarian club Ludogorets hi first leg inkhelah tlawhin, Inter hi si hnih faiin an chaka, tunkar hian second leg inkhelah Inter hian San Siro-ah Ludogorets hi an lo mikhual ve thung dawn.

Serie A lam pawh hian an game thenkhat chu entu awm lova khelh an duha, sawrkar hnenah pawh dilna an theh lut tawha, Italy Sports Minister Vincenzo Spadafora pawhin entu awm lova khelh chu a thlawp viau tih tarlan a ni.

Italy-ah hian mi 200 chuangin coronavirus hi an vei tawh anga sawi a ni a, mi panga laiin an thihpui tawh nia tarlan a ni bawk. Italy-hi Asia pawnah chuan coronavirus vei leh thihpui tamna ber a ni meka, Italy-ah hian Serie A club te chauh lo pawhin coronavirus avang hian buaina an tawk chho mek a ni.