Coronavirus kai hlauh avangin Chelsea midfielder N’Golo Kante chu tun season-ah a inkhel tawh rih lo maithei niin Sky Sports chuan a tarlang.

Chelsea hian tun kar Thawhlehni khan training an nei tan leh tawha, Thawhlehni hian Kante hi a thiante zingah training nei mahse, hemi hnu hian Chelsea training-na hmun Cobham-ah a la inlan leh lo.

Kante hian kum 2018 World Cup hma lawk khan a unaupa chu heart attack avangin a chana, a mah pawh hi kumin kum tir lam khan training-naah nikhaw hre lovin a tlu bawka, heng avang hian a tan coronavirus kai hi a hlauhawm bika ngaih a ni.

Premier League hian Sunday liamta leh Thawhtanni te khan player leh staff te hi COVID-19 test runpui thawhkhatna an neihpuia, Ningani khan test thawhhnihna neih leh niin, hetah erawh Kante a inlan.

Premier League player te hi training tura tih luih an ni lova, an duh chuan training hi an zawm lo thei a, Watford captain Troy Deeney pawhin training hi a zawm rih loh tur thu a lo sawi tawh.

Kante pawh hian Thawhlehni khan training zawm zet mahse training a zawm chhunzawm tawh dawn rih lova, season tluanin a inhnamhnawih tawh lo maithei bawk a ni.