16 Oct 2020 04:34

inkhel

Coronavirus dan bawhchhetu Cristiano Ronaldo

Cristiano Ronaldo chu COVID-19 a vei tih an finfiah hnuah Italy rama inkaihhruaina dan a bawhchhe ngei niin an sawi.

Juventus forward Cristiano Ronaldo hi Thawhlehniah khan a positive tih an puang a, hei vang hian Sweden nen Nations League an khelhah pawh a tel ve loh phah a. Amahin ni 10 chhung inkhung hrang tura tih a ni.

Kum 35-a upa Cristiano Ronaldo hi mahnia ni 10 chhung inkhung hrang tura tih a nih laiin Nilainiah khan Portugal ram atangin a private jet hmangin Italy ramah a thlawk lut a. A positive tih an hriat hnua an ram chhuahsana ram dang a la pan hi thuneitute chuan an duh lo hle.

Italy ramah chuan tu pawh an positive a nih chuan a lo berah ni 10 chhung chu an inkhung hrang ngei ngei tur a ni a, Portugal ramah phei chuan ni 14 chhung inkhung hran ngei ngei a ngai bawk a. Tunah chuan Portugal pawh hian inkhung hran hun chhung tur hi ni 10 a pawh tawi an nei ve tawh tho a ni.

Vincenzo Spadafora, Italian sports minister chuan Cristiano Ronaldo chu Italy rama a luh tho avangin an ram inkaihhruaina dan a bawchhe ngei a ni tih a sawi a. Thiamloh an chantir a nih chuan Portuguese forward hian hremna a hmachhawn ngei a ngaih hmel hle.

Spadafora chuan, “Cristiano Ronaldo kha a positive tih hriat a nih hnuah Italy ramah a rawn thlawk lut a, hei vang hian ram inkaihhruaina dan a bawhchhe chiang a ni,” a ti.

Ronaldo khelhna club Juventus chuan tun thlaa UEFA Champions League an khelh huna Barcelona an hmachhawn hunah Cristiano hi chhawr hman an duh a, hei vang hian Italy rama awm ngei tura an duh a. Hetianga thu neuh neuh a awm takah pawh hian club chuan an player chu thil tihsual nei nia an ngaih loh thu an sawi.

Club president Andrea Agnelli chuan, “Dan bawhchhiatna a awm kan hre lo a, thil dik lo a awm a nih chuan Ministry of Health leh Ministry of the Interior te biak chi a ni ang. Kei ni chuan tih dik loh kan neih kan hre ve lo,” a ti.