LeBron James chuan entu mipui awm loa inkhelh a duh loh thu a sawi kha coronavirus chungchang an sawi tih a hriat loh vang a nih thu a sawi.

Kar hmasa Zirtawpniah khan NBA thuneitute chuan thu chhuah siamin, tun laia coronavirus darh mek karah invenna atan entu awm loa inkhelh a ngaih hun pawh thleng thei a nih thu an tarlang a. Hemi hnuah hian LeBron James chu a ngaihdan an zawt a, James hian entu awm lohnaa inkhelh chu a duh loh thu a lo sawi a ni.

NBA chuan coronavirus darh zel laka an invenna atan a tul a nih chuan entu tel loin, mi pawimawh zual tlemte te hmaa inkhelh a tul hun a thleng thei a ni tih an sawi a. Team hrang hrangte thliar bik loin, hetianga entu awm loa inkhel tur hian tih vek an nih tur thu an sawi bawk a ni.

James chuan mipui tana inkhel a nih thu sawiin, entu awm miah lohnaa inkhelh ai chuan khelh loh law law a thlan zawk thu a sawi chhuak a. Tunah chuan a thil sawi hi thil a hriat chian loh vang niin a sawi leh tawh a, coronavirus chungchang an sawi vang a ni tih a hriat loh thu a sawi chhuak.

“Entu awm lohnaa inkhelh ka duh leh duh loh min zawh khan coronavirus chungchang a ni tih ka lo hre miah lo a. He natna hri leng mek avang hian ruahmanna thar an siam a ni tih pawh ka lo hre lo,” tiin James chuan a sawi.

“A nihna takah chuan min au phurtu an awm miah loh chuan a hrilhhaithlak hle dawn a, anni tana inkhel ka nih miau avangin hriatthiam a harsa ang a. Ka chhungte tan ka inkhel a, min tantute tan ka inkhel thin,” a ti bawk.

A sawi zelnaah, “Hetih rual hian kan chhehvel boruak thlir reng chunga thuneitute’n hma an la a nih a, entu awm loa inkhelh a ngai a nih chuan a tul dan angin kan insiam rem ve tawh mai ang a. Player te tan, team tan, NBA tan leh league tana tha zawk nia an hriat chuan an sawi chu kan zawm mai tur a ni,” a ti.

United States huam chhungah coronavirus kai nia finfiah 732 an awm tawh niin an sawi a, heng zinga 26 te chuan nunna an chan tawh niin an sawi.