Copa Libertadores final second leg River Plate leh Boca Juniors intum tur chu chu inrinni liamtaa khelh tura ruahhman ni mahse River Plate supporter lamin Boca player-te chuanna bus an beih avangin sawn hlat a ni a, an khelh hun tur tak hriat a la ni lo.

Thlaleh Decemer ni 8 emaw ni 9-a khelh a nih a rinawm a, a hun leh hmun tur hi puan a la ni lo. First leg-ah team hnihte hi 2-2 a inhnehtawkin, second leg-ah chinfel chhunzawm tur a ni.

CONMEBOL president Alejandro Dominguez chuan club hnih team president-te a hmu ve ve tawh a, final second leg chu Argentina ram pawna khelh mai an rel ta a ni.

South America-a football thuneitu sang ber CONMEBOL chuan a hun leh hmun chu puan a nih thuai tur thu an tarlanga, venhimna pawh khauh taka kalpui a nih tur thu an tarlang tel bawk.

Argentine club inhal em em pahnih River Plate leh Boca Juniors-te intum tur hi kum 127 hnuah Argentina football chanchina inkhel ropui ber tura ngaih a ni meka, tluang takin second leg hi an khelh zawh theih ngei a beiseiawm.

Boca chuanna bus beihnaah hian darthlalang keh avangin player an inhliam nuala, tear gas-te kah luh ni bawkin, boruak thalo hip luh nasat avanga damdawiin hruai ngai an tam hle. Hliam tuar zingah hian Manchester khaw club pahnih tana lo khel tawh Carlos Tevez pawh a tel ngei niin media-te chuan an tarlang tel.