Copa Libertadores final second-leg chu buaina tam tak karah khelh zawh a ni ta hram a, River Plate chuan an hmelma lian tak Boca Juniors chu 3-1 in an hneha, first leg-ah team hnihte hi 2-2 a an lo inhnehtawk tawh bawk avangin aggregate-in River Plate hi 5-3 in an chaka, an champion.
First leg hi Boca Juniors khelhmual La Bombonera-a khelh a lo ni tawh a, second leg chu River Plate khelmual El Monumental-a khelh leh tur ni mahse Boca player-te second leg khel tura an kal chu River supporter ruh zual ten an lo beih avangin final hi a hun leh hmun sawn hlat a ni. El Monumental-a khelh tura ruahmman ni mahse Copa Libertadores final chu Europe khawmualpuiah Real Madrid khelmual Santiago Bernabeu-a chinfel a ni ta a ni.
River tan hian Lucas Pratto, Juan Quintero leh Gonzalo Martinez-ten goal khat theuh an khunga, Boca tan hian Dario Benedetto chuan goal a khung ve bawk. Inkhel hmuhnawm tak team hnihten football khawvel min hlui a, menrei pawh a inchhirawm loh kher mai. Boca lam hian first half-ah goal khungin hma an hruai a, second half-ah River lamin an si phurh rulin, hun pangaiah goal khung belh thei an awm lo. Extra-time khelh a ni a, Boca player Wilmar Barrios chu 92nd minute-ah hnawhchhuah a ni a, Boca –in an tuar hle a tih loh theih loh. Minute 109-na leh minute 120+2 ahte Boca hian goal chhuah belhin inkhel hi 3-1 in a tawp a, kum 2018 Copa Libertadores champion chu River Plate an ni ta a ni.
River Plate 3-1 Boca Juniors (agg: 5-3)
(Pratto 68’, Quintero 109’, Martinez 120+2’) (Benedetto 44’)
PLAYER RATINGS
River Plate - Armani 6, Maidana 4, Montiel 5, Pinola 5, Casco 6, Ponzio 5, Perez 8, Fernandez 7, Martinez 8, Pratto 7, Palacios. Subs - Quintero 8, Mayada 6, Zuculini 5, Alvarez 6.
Boca Juniors - Andrada 6, Buffarini 5, Izquierdoz 6, Magallan 6, Olaza 6, Nandez 8, Barrios 4, Perez 7, Villa 7, Pavon 6, Benedetto 7. Subs - Gago 5, Abila 6, Jara 6, Tevez 6.