Argentina winger Angel Di Maria chuan nakkum nipuia khelh tur Copa America zawhah international football chawlhsan a tum thu a sawi.

Nakkum Copa America hi CONMEBOL leh CONCACAF ten an organise ho dawn a, USA-ah khelh tur niin June thla-ah an khel dawn a, champion lai hi Argentina an ni.

Di Maria hian nakkum Copa America hi khelh a la tum hle tih a lang a, Ningani khan kum 35 mi hian Copa America zawha international football a chawlhsan tur thu hi a sawi.

Benfica player hian kum 2008 khan Argentina tana a game hmasa ber a khel a, a ram tan hian vawi 134 zet inlan tawhin goal 29 a khung tawh a, Copa America leh FIFA World Cup a chawi tawh bakah Olympic Gold medal a la tawh bawk.

Kum 2021 khan Argentina hi Copa America-ah an champion a, hei hi kum 28 hnua major trophy an chawi leh vawi khatna a ni a, nakkumah an title humhim an tum dawn a, World Cup champion lai an ni bawk nen, nakkum Copa America-a champion leh tura rinkai ber an ni.

Di Maria hi Argentine club Rosario Central academy chhuak a ni a, kum 2005 khan a professional career bul tanin, Argentina U20 leh U23 tana a khelh hnuah kum 2008 September thla khan Paraguay lakah Argentina senior team tana a game hmasa ber a khel a ni.