He intihsiakna hi June ni 12 atang hian Chile-ah khelh tan a ni dawn a, game hmasa ber chu a thlengtu ram Chile leh Ecuador-in Santiago khawpuia Estadio Nacional-ah an khel ang a he stadium-ah tho hian July ni 4-ah final khelh a ni ang.

Champion lai chu Uruguay an ni a, he team hian tun tum Copa America-ah hian hrem vangin an striker chhuanvawr Luis Suarez an chhawr thei dawn lo.

Tun tum Copa America-a che tha tura rin player 20 Sky Sports-in an tarchhuahte:

* Alexis Sanchez (Chile) - Arsenal forward hian season liamta Premier League-ah khan goal 16 khungin thiante pet goal tura siamsak vawiriat a nei a, FA Cup final-ah goal nalh tak khung bawkin London club hi a champion pui.

* Arturo Vidal (Chile) - Kum 28 mi Vidal hian season liamta khan Juventus nomawi pahnih a chawipui a, Champions League final a thlenpui bawk. Chile hian striker anga Alexis Sanchez an hmang anih chuan Vidal hi a chawmtuah a awm ngeiin a rinawm.

* Claudio Bravo (Chile) - Barcelona goalkeeper hian tun tum bak chu Copa America a khel tawh lo maithei a, kum 32 mi a ni tawh. Barca-ah Marc-Andre ter Stegen nen khelhna hmun inchuhin an inel a, kum 2014 World Cup-ah khan a thatdan chu khawvel hmuhah a pholang tawh.

* Rafael Marquez (Mexico) - Kum 36 mi ni tawh mahse Monaco, Barcelona leh Verona defender hlui hi Mexico innghahna tur pakhat chu ala ni pha ngei ang. Ram tan hian game 124 a khel tawh a player tawnhriat ngah tawh tak a ni bawk.

* Enner Valencia (Ecuador) - West Ham striker hian season liamta khan game 32 khelin goal li chiah a khung a, mahse a thiamna a tha a hla tak atanga ball hlauhawm pet thei a ni bawk nen kumin Copa America ti hmuhnawmtu a ni lo ang tih a sawi theihloh.

* Jefferson Montero (Ecuador) - Swansea winger Jefferson Montero hi tun season Premier League-a player hmuhnawm berte zinga pakhat ti ila kan sawi sual awm lo ve. Season liamta khan thiante pet goal tura siamsak vawisarih a nei a player tharum ngah leh tlan chak a ni.

* Lionel Messi (Argentina) - Kum 2014 World Cup-a Golden Boot dawngtu Messi hian tun season-ah a khelhna Barcelona chu La Liga, Copa Del Rey leh Champions League nomawi a chawipui a, club lamah hlawhtling viau mahse Argentina hi intihsiakna lianthamah a champion pui hleithei lo. Tun Copa America-a player en hlawh ber tur pakhat a ni ang.

* Angel di Maria (Argentina) - Manchester United winger hi tun season-ah a khelhthat tawk loh vanga sawisel ni mahse kumin Copa America-a player ngaihven hlawh tur zinga pakhat a ni a, season liamtaa a chechhiatna te thai reh turin Chile-ah hian theihtawp a chhuah ang.

* Carlos Tevez (Argentina) - Manchester United leh Manchester City striker hlui hian Italy-ah a thiamna a pholang a, season liamta Seria A-ah khan goal 20 khungin a khelhna Juventus a champion pui. Alejandro Sabella hnuaiah ram tan khel tura kohna dawng pha lo mahse Gerardo Martino hnuaiah chuan koh a ni ta a, striker dang awm bawk mahse Sergio Aguero nen khelhna hmun inchuhin an inel ber a rinawm.

* Sergio Aguero (Argentina) - Manchester City striker hian season liamta Premier League-ah khan goal 26 khungin top scorer a ni a, Champions League-a Bayern Munich an hmachhawn tum pawhin goal thum a khung thei a Argentina tlarhma luahlum turin Carlos Tevez nen an inel a rinawm.

* Edinson Cavani (Uruguay) - Manchester United nen sawizawm deuh reng Cavani hian season liamta khan PSG tan game 50 khelin goal 27 a khung a, tun Copa America-ah hian Uruguay innghahna ber a ni hmel a. Champion lai hian hrem vangin Luis Suarez an chhawr thei dawn lo va, Cavani-ah hian an in nghat thui viau maithei.

* Diego Godin (Uruguay) - Atletico Madrid defender hian kum 2011 Copa America-ah khan minute hnih chiah a khel pha a, tun tumah erawh Uruguay tlarhnung innghahna ber ang. Season liamta La Liga-a goal chhuah tlem ber chu Atletico Madrid an ni a, hemi ti tur hian Godin hi an player pawimawh a ni.

* Philippe Coutinho (Brazil) - Liverpool midfielder hian season liamta khan goal nga khungin thiante pet goal tura siamsak vawinga tho a nei a, PFA Team of the Year-ah a tel bawk. Inter Milan midfielder hlui kum 22 mi hi 2014 World Cup khel turin koh a ni pha lo va, mahse tunah chuan koh loh phalloh khawpa tha a ni tawh.

* David Luiz (Brazil) - Chelsea defender hlui hi ball thiam leh goal khung thei a ni a, season liamta khan intihsiakna pahnihah PSG a champion pui.

* Neymar (Brazil) - Barcelona forward hian season liamta khan goal 38 a khung a, La Liga, Champions League leh Copa Del Rey-ahte Catalan club hi a champion pui. Tun tum Copa America-a player en hlawh leh lawm hlawh ber pakhat anih a beiseiawm.

* Robinho (Brazil) - Manchester City striker hlui hian season liamta khan loan-in an ram club Santos-ah hun a hmang a, a club diktak chu AC Milan a ni. Kum 31 mi ni tawhin tunhma lam chu pha tawh lo mahse a thiamna ala hloh lo va, player hmuhnawm tura beisei zingah a tel.

* James Rodriguez (Colombia) - Real Madrid midfielder hi 2014 World Cup-ah khan a chetha hle a, season liamta khan hliamin a tibuai deuh a mahse damtha tawhin tun Copa America-a player mit la tur pawl tak a ni.

* Radamel Falcao (Colombia) - Season nga chhungin Porto, Atletico Madrid leh Monaco tan belhkhawmin goal 153 a khung thei a, mahse season liamta khan loan-in Manchester United-ah a khel a beisei a pha lo tluan zak. 2014 World Cup kha hliam vangin a khel thei lo va, in tuai thar lehnan tun Copa America hi atan hun remchang tak a ni ang.

* Carlos Bacca (Colombia) - Sevilla striker hian season liamta La Liga-ah khan goal 20 a khung thei a, Europa League final-ah goal hnih khung bawkin Spanish club hi a champion pui. A chethat vang hian Europe-a club lian thenkhat nen sawizawm mek an ni a, Colombia tan in nghana tlak khawpa player tha a ni.

* Jefferson Farfan (Peru) - Argentina player ropui ni thin Diego Maradona chuan Schalke winger hi tun tum Copa Americaa player hmuhnawm tur a thlan zingah a dah tel a, season liamta kha khup hliam vangin a khel tam lo. Kum 2011 Copa America-ah khan Peru hi pathumna an ni a, tun tumah hian Farfan hi Claudio Pizzaro nen an player langsar ber an ni ang.