Estadio Nacional, Santiago khelmuala Copa America 2015 final inkhelah a thlengtu ram Chile chuan a tum khatna atana "major trophy" an chawina ni turin Argentina chu finalah hnehin Copa America 2015 champion an ni ta.
He final inkhelah hian hun pangngaiah leh extra time thlenga goal a luh loh avangin chak zawk zawnna penalty shootout hmanga neih a ni a, Chile chu vannei zawkah an tang ta a ni.
Argentina vanduai a kaltluang zela, nikum mai 2014 Fifa World Cup final ah lo tlawm tawhin, Copa America 2015 final ah pawh a tlawm zawkah an tang leh ta hlauha, kum 1993 a Ecuador rama Copa America an chawi atanga kum 22 zet a liam leh hnuah pawh nomawi liantham an chawi lo chhunzawm ta zel a ni.
He final ah hian Mastercard Man of the Match atan Chile midfielder Juventus tana khel mek Arturo Vidal chu thlan a ni.
Chile 0-0 Argentina
(penalty 4-1)
Chile - Bravo, Isla, Medel, Silva, Beausejour, Vidal, Díaz, Valdívia (Fernández - 75' ), Aránguiz, Vargas (Henriquez Iturra - 95' ), Sánchez
Argentina - Romero, Zabaleta, Demichelis, Otamendi, Rojo, Biglia, Mascherano, Pastore(Banega - 81'), Messi, Agüero (Higuaín - 74' ), Di María (Lavezzi - 29' )
First half inkhel hmuhnawm takah a thlengtu Chile in hun tam zawkah inkhel an thunun a, inkhelh tan phat atangin an goal nawr a na nghal hle. Clear chance pawh nei hmasa zawkah tangin, 11' ah mual dinglam atanga Sanchez cross chu dan per a nih hnuah Vidal chuan goal ah a shot a, Romero a'n a lo dan sak thei hlauh a ni.
Bul tan tha lo Argentina in 20' ah chance mumal tak an nei ve chauha, mual dinglam atanga freekick hmanga Messi ball thlawh luh hlauhawm zet chu Aguero chuan chiang zetin goal hawi zawngin a lo tauha, Bravo a che hman ve leh hlauh bawk. 29' ah Di Maria chu inhliam vangin lakchhuah a ni a, a aiah Lavezzi a lut a.
Chile in inkhel thunun chhunzawmin, Sanchez leh Vargas hmangin half chance te pawh an nei chhova, counter-attack ah Argentina an hlauhawm ve lek lek zel bawk. Inkhelh chawlh lawk hnaihah Pastore cross atangin Lavezzi chuan a khung teuh hle a, a strike kawh zet mai chu Bravo chuan a lo nam chhuah sak hman. First half inkhelah Argentine player che tha zual sawi tur an awm lova, Valdivia leh Sanchez ten Chile tan first half an khel tha hle thung.
Second half inkhelah pawh Chile bawk an chungnunga, chance hlauhawm tak sawi tur erawh a khawi team ve ve mahin an nei tam lo hle. Second half tan tirhah Argentina tlarhnung an talbuai nghala, Vidal a'n a chhawr tangkai teuh hle. Chile in inkhel thunun chho viau mahse goal hmaah an zuih ral zela, 82' ah Sanchez hmangin clear chance an hmu ve chauh a, hmun leh hmun deuhthaw atanga a shot chu goal sirah a kal hlauh.
Goal thunna chance hmu tur khawp pawha khel tha lo Argentina chu Higuain hmangin hun tawp dawn tak takah chakna goal thun zawk tu ah an tang teuh hle a, Messi ball lakluh tha zet chhawra Lavezzi a'n hlauhawm taka a cross chu Higuain chuan goal hmaah tak a lo thelh hlauh a ni.
Extra time khelh niin extra time ah pawh chance hmuh tur a tam lo chhunzawm zela, Mascherano tihsual zara Sanchez a'n chance tha a hmuh chu thelh ve lehin team pahnih te hun tawp thlengin chakna goal thun tumin an innawr tawn zak zaka, goal an thun theih tak loh ve ve avangin penalty shootout hmanga chak zawk zawn a ni ta a ni.
He penalty shootout ah hian Chile tan Fernandez, Vidal, Aranguiz, Sanchez ten petin an khung veka, Argentina tan Messi, Higuain leh Banega ten pet ve bawka, Higuain leh Banega ten an thelh tak avangin Chile chuan penalty hmangin 4-1 in Argentina lakah hnehna an chang ta a, Copa America 2015 champion an ni ta a ni.
Match Summary : Hetah