11 Jan 2019 04:52

inkhel

Constantine-a’n India team sawiseltute a chhang let

India head coach Stephen Constantine chuan Asian Cup khelh meka 0-2 a UAE an hneh loh hnuah a player te chu a chhan hle a, kum 71 chhung tumahin an tih theih loh titute nasa taka an sawisel chu mak a tih thu a sawi.

India chuan an match hmasaah Thailand an hneh a, kum 71 chhunga Asian Cup-a India chak hmel hmuh hmasak ber a ni a. Match hnihnaah a thlengtu UAE an hmachhawn a, 0-2 in an tlawm a, an chak loh takah chuan India team hi an sawisel nasa hlawm hle a, hei hi Stephen Constantine chuan a ngaithei vak lo a, a chhang let hial a ni.

Stephen Constantine chuan, “Ka squad te hi ka ring tawk a, kum li kalta atang khan an che tha thei em em a. Kan inkungkaihna a tha a, kan inpawh hlawm em em a. Heti taka kan inpawh tlan avang hian miin an sawisel hlek chuan ka rilru a na hma thei hle a ni,” a ti.

“A nihna takah chuan heti taka an sawisel hi ngawih liam mai chi niin ka hre lo a. 1964 atanga tumahin an la tih theih loh kha ka team te hian an ti thei a, eng tikah nge Asian Cup ah hian India hi hetiang tak hian an chet that tawh le? A teuh ber chu 1964 kha a ni hial maithei,” a ti bawk.

Kum 56-a upa Constantine chuan, “Nilaithawhtan khan UAE laka goal thun theihna hun remchang kan insiam nual a, first half ringawtah pawh khan game hniha chakna tham hun tha kan nei hman a ni. Goal thun lo mahse ka naute kha an che tha khawp mai a, a pawi ta ber chu goal an thun thei tlat lo kha a ni,” a ti.

“Game hmasaah goal kan hun thei a, 4-1 in kan chak reng a, UAE lakah pawh khan a hma angin goal thun thei ila chuan 4-0 vela chak thei tur chu kan ni a. Hetiang zat thun kher loin, goal khat tal pawh kha lo thun ila UAE kha chu an buai vek ang,” a ti bawk.

British coach chuan, “Indian coach tha mamawhna a san zia kan hmuh thar belhin ka hria a. UAE leh Thailand player te khel kha in lo en chian chuan ball kha duh ang takin an khawih thei bik a, keini chu kan ni ve tlat lo. India ramah hian coach te an inzir uluk a ngai hle a, chutiang a nih ngat chuan player pawh tun aia tha hian an chher chhuak thei ngei ang,” a ti.