‘Conor vs Floyd 2’ a awm leh thut thei

03rd September 2018, 10:09PM

Conor McGregor leh Floyd Mayweather te chu an inhmachhawn leh thut thei niin sawi a awm a, boruak a inmung chho mek niin an sawi.

Floyd Mayweather-a pa, Floyd Sr chuan a fapa Mayweather leh Conor te chu inbei leh thei dinhmunah an ding chho tan tih sawiin, an inbe chho mek niin a sawi a. Tun hnaiah social media kaltlangin McGregor leh Mayweather te hi an inngur chho mek a ni.

Kum khat dawn hnai kaltaah khan anni pahnih hi boxing ring chhungah an lo inbei tawh a, round 10-naah Mayweather chu chak zawka puan a ni a. An pahnih hian sum tam tham em em mai an dawng ve ve a, hemi hnu hi chuan an pahnih hian tumah an bei zui leh rih lo a ni.

Floyd Mayweather Sr chuan, “Anni pahnih awm dan atang hian an inbei leh ngei dawn niin a ngaih theih a, a lan danah chuan chiang tluka ngaih theih a ni hial ang,” a ti a.

“Thu ka pawt chat ngam hauh lo a, mahse tuna thil awm dan atang hi chuan ka sawi sual lutuk lo maithei a. Ka fapa hian inbeih leh hi a duh ngei chuan ka hria a. McGregor hi chuan inbeih hi a la duh tih a chiang a, mi hmaah eng tak nge a tih theih tih hi lantir a duh a, mahse engmah tih theih a nei si lo,” a ti bawk.

Boxing ring-ah an inbei tawh a, a lehpekah chuan Octagon chhunga inbei leh tura ngaih an ni a. Mahse, Mayweather Sr chuan Octagon hi chu a nih a rin loh thu sawiin, Conor leh Floyd Jr te hi an inbei leh dawn a nih pawhin boxing ring chhungah tho a nih a rin thu a sawi.

Mayweather Sr chuan, “A hma ang bawk khan a nih ka ring a, boxing dan hmanga an inbeih leh a rinawm ber a. Conor McGregor hian phuba lak a chak a, mahse chutiang chu a puitlin thei dawn hauh si lo a. Tunah hian an sawi chho mek a, a boruak pawh a sang tan viau a ni,” a ti.

Copyright © inkhel.com 2024. All rights reserved.