14 Feb 2020 05:12

inkhel

Conor hnek tur khan ka inpuahchah vak lo: Mayweather

Floyd Mayweather chuan Conor McGregor nen an inhnek dawn khan ‘push-up’ leh ‘sit-up’ te chu a training neihna ber an nih thu a sawi.

Boxing legend Floyd Mayweather chuan 2017 kumah khan UFC star Conor McGregor chu a hneh a, hemi hnuah hian inhnek chu a chawlhsan zui nghal a. Irish fighter nen an inhnek tum khan thapui thawh a ngaih loh thu sawiin, inpuahchahna pawh nasa taka a neih loh thu a sawi chhuak.

American boxer Mayweather chuan Conor nen an inhnek tum hian a tir lamah chuan a ti tha duh vak lo a, an inhnek rei tial tial a, McGregor a hah tan tihin a nawr na tial tial a, a tawpah chuan a chak ta nge nge a ni.

Mayweather chuan, “Conor McGregor nen kan inhnek dawn khan nasa takin ka inpuahchah hran lo a, boxing session pangngai ka neih thin bakah push-up leh sit-up ka tih thin bak kha chu a hranpain training ka nei lo,” a ti.

“Push-up leh sit-up ka tih bakah bag kha ka hnek tel zeuh zeuh a, kha kha ka training neih ve chhun chu a ni ber a. Ka khingpui tur ngaihtuah khan chuti vaka inpuahchah kha ngaiin ka hre lo a ni,” a ti bawk.

A sawi zelnaah, “Training camp kha hmun hrang hrangah ka nei a, Vegas khawpuiah rei vak lo te ka nei a, hmun dangah te ka nei leh daih bawk a. A chang kha chuan kar khat chhung gym tlawh miah loh pawh ka nei,” a ti.

“Kha inhnek tur kha ngai thutak lo ka ni miah lo a. Inhnek dawn hi chuan nuam tih ve ka duh thin a, chu bakah a entute tana ennawm siam hi ka duh dan a ni a, kha vang khan ka la ho hran lo a ni,” tiin a sawi.

Nikum November thlaah khan Mayweather chuan 2020 kumah chawlh a puan chu a rawn bawhchhe dawn niin a sawi a, UFC president Dana White nen an thawk dun dawn niin a sawi a ni.

Tun hnaiah Conor McGregor leh Khabib Nurmagomedov te chu ni khata hnek ve ve a duh thu te a sawi chhuak a. Chhunah Khabib nen inhnekin, zan lamah Conor nen inhnek a duh thu a sawi a ni.