Floyd Mayweather chuan lockdown laiin gym-ah training a nei thin a, Conor McGregor chuan rematch neih a duh tawh lo niin a sawi.
American boxer ropui Floyd Mayweather leh UFC star Conor McGregor te chu 2017 ah khan boxing ring chhungah an inhmachhawn a. Hemi tuma an inhnekah hian Mayweather chu a chak a, hei hi professional boxing a khelh hnuhnun ber a ni bawk a ni.
Anni pahnih hi inhnek leh thei tur anga sawi a awm zeuh zeuh a, tun hnaiah Floyd Mayweather chuan Conor McGregor hming a lam ve leh bawk a, rematch an neih leh mai ringtu pawh an awm tan mek a ni.
Kum 43-a upa Mayweather chuan inhnek a chawlhsan tawh a, hetih rual hian nikum November thlaah khan 2020 chhungin inhnek leh thei dinhmunah a ding tih thu a sawi a, UFC boss Dana White nen event ropui tak neih dan an ngaihtuah thu a sawi a ni.
Mayweather chuan Las Vegas khawpuiah training hi a nei thin a, Instagram Live video atangin McGregor hming chu a lam a, “Khawiah nge Conor McGregor hi? Hetiang hi ani chuan a ti ve duh lo,” tiin a sawi a ni.
Kumin January thlaah khan Conor McGregor chu UFC huangah a inlan ve leh a, hetah hian Donald Cerrone chu awlsam takin a hneh a. Hetianga a chak hnuah hian Mayweather chuan Irish fighter nen rematch neih leh hi a duh leh deuh niin a lang a, rematch poster siam chawp pawh internet lamah a pho chhuak nghe nghe a ni.
McGregor chuan Mayweather nen an inhnek hma khan boxing coach a ruai miah lo a, striking trainer Owen Roddy leh John Kavanagh te chauh a ruai a. A fight hnuhnung ber atan khan Crumlin amateur club lamah boxing coach kaihhruaina hnuaiah training a nei ve tawh a, Olympian hlui Phil Sutcliffe chuan kum 31-a upa Conor hi octagon ah pawh a tawiawm a ni.
January thlaah khan Conor chuan boxing lamah pawh a intuai hriam tawh thu sawiin, “Floyd nen kan inhnek khan tun angin inhnek kha ka thiam lo a, hnek fuh loh kha ka ngah mai a. Tunah chuan coach te min kaihhruaina hnuaiah hma ka sawn nasa khawp mai,” a ti.
“Rematch nei leh ngat ila Floyd chu ka hneh tawh hrim hrim ang. Inhnek leh pawh ka chak khawp mai a, rematch hmuhnawm tak en tur a awm ngeiin ka ring a. Boxer dang nena inhnek pawh ka chak a, Manny Pacquiao nen pawh hian inhnek thei ila ka ti hle,” a ti bawk.