Dana White chuan Conor McGregor chu Khabib Nurmagomedov nen rematch neih theih tluka duh a nei lo niin a sawi.

Conor McGregor chu BMF title kawltu Jorge Masvidal nen insual thei tur anga sawi a awm mek a, hei hi chu UFC president Dana White chuan a thlen a rin loh thu a sawi a. Hetih lai hian Notorious chuan Donald Cerrone a hneh a nih chuan a hmaa a lo hneh loh tawh chu hmachhawn thut thei a nih thu a sawi thawi a ni.

UFC president Dana White chuan, “A nihna takah chuan Conor hian Khabib vs Ferguson hi a thlen tak tak a la ring miah lo a. Anni pahnih hi vawi eng emaw zat kan lo chotuah tawh a, an la insual thei lo zel mai a. Tun tumah pawh hian a tak ram a thlen leh tak tak hi McGregor chuan a ring lo a ni,” a ti.

January 18 ah hian Las Vegas khawpuia T-Mobile Arena-ah UFC 246 a awm dawn a, hetah hian Conor McGregor leh Donald ‘Cowboy’ Cerrone te chu an insual dawn a. April 18 ah khian UFC 249 ah Khabib Nurmagomedov leh Tony Ferguson te chu insual tura ruahman an ni bawk a ni.

White chuan, “Conor hian Cerrone nen 170 category-a insual hi a duh a, hetiang a duh chhan bulpui ber pawh hi Khabib leh Ferguson te an insual leh thei lo a nih pawhin Khabib hmachhawn theih a duh vang a ni,” a ti.

“Engtin nge thil hi a awm chhoh zel dawn tih chu a hriat rih loh a, lo ngaichang zel phawt ila. Dik tak chuan Conor hian eng dang zawng aiin Khabib nen insual leh theih hi a duh ber a, chu aia vei hi a nei lo,” a ti bawk.