Manny Pacquiao chuan Conor McGregor leh Floyd Mayweather te chu inhnek nawn leh se, Conor chu chak zawk ni tawh tura a ngaih thu a sawi.

Floyd Mayweather leh Conor McGregor te chu August 2017 khan boxing ring-ah an inhmachhawn a, hemi tumah hian ‘Money’ Mayweather chuan ‘Notorious’ McGregor chu a hneh a, sum tam tham tak an hui ve ve a ni.

Boxing ring chhunga an inhnek hnuah hian inhmachhawn nawn leh tur angin an sawi nasa hle a, tun thleng chuan a tak ram a thleng leh ta rih lo thung a. Conor McGregor chuan an inbei leh dawn a nih chuan boxing ring chhungah ni tawh loin, a tlangnelna hmun Octagon lamah ni ve tawh se a duh thu a sawi a ni.

Hetiang boruak karah hian Filipino boxer Manny Pacquiao chuan Floyd Mayweather chu hnek leh a duh thu a lo sawi ve mek bawk a. Anni pahnih hi kum li kaltaah khan an inhnek a, a tawpah Mayweather chu chak zawka puan a ni.

Mayweather leh McGregor te chungchang hi Pacquiao an zawt a, Filipino legend chuan boxing dan hmang ni loin, MMA dan hmanga an inbei leh a nih chuan McGregor chu chak zawk tura a rin thu a sawi.

Pacman chuan, “MMA leh boxing te hi chu a inang lo khawp mai a, thil danglam deuh mai, kal hrang hlak a tih theih a. Boxing bikah phei hi chuan fit a ngai em em mai a, duh anga fit tawk lo chu an talbuai nghal a ni mai,” a ti.

“Floyd leh Conor te hi infiammi tha tak mai an ni ve ve a, inhmachhawn leh pawh ni se an zahpuiawm lo viau ve ve dawn a. A pawimawh ber tur chu khawi hmunah nge an inbeih tih hi a ni,” a ti bawk.

A sawi zelnaah, “MMA dan hmanga an inbei a nih chuan MMA fighter Conor McGregor chu a chungnung dawn chiang a. Boxing dan hmanga an inbei leh a nih erawh chuan boxer tha Floyd Mayweather chu chan tha zawk tura ngaih a ni,” a ti.

Kum 40-a upa Manny Pacquiao chuan boxing chawlhsan tawh kum 41-a upa Floyd Mayweather chu boxing ring chhunga kir leh tura a duh thu sawiin, chutiang hun a thleng a nih chuan hmachhawn tura a inpeih reng thu a sawi a. Tun kar Inrinni hian Pacman hian Keith Thurman a hmachhawn dawn a ni.