Mike Tyson chuan boxing ring chhungah inhmachhawn ta se, Conor McGregor chu a hneh chian viau a rin thu a sawi.

Kum 54-a upa boxing legend Mike Tyson chu hun rei tak a chawlh tawh hnuah boxing ring chhungah a inlar leh dawn a. September 12 ah hian Roy Jones Jr nen exhibition match ah an inhnek dawn a ni.

Tun hnaia The Tonight Show-a a inlan tumin Jimmy Fallon chuan Mike Tyson hi Conor McGregor chungchang a sawipui a, Mike chuan, “Boxing ring chhungah inhmachhawn ila, boxing dan kan hmang a nih phawt chuan ka sawp hrep thei ang,” a ti.

‘Iron’ Mike Tyson hi a vanglaiin vawi 58 a inhnek hman a, hengah hian vawi 50 chakin, mi 50 a hneh zinga 44 zet chu a knockout a. Vawi 6 chu hneh loh a tawng a, vawi 2 chu no contest a puan a ni bawk a. A vanglai hian vawi hnih chu world heavyweight champion a ni hman a ni.

Tyson hi a inhnek hnuhnun ber chu 2005 ah khan niin, kum 15 vel zet a chawlh tawh hnuah kuminah boxing ring chhungah a che leh dawn a. Chawl rei tawh viau mah se tha taka a la inhnek theih zel a rin thu sawiin, tlema hming langsar ve deuhte pawh a la huphurh loh thu a sawi bawk.

Jimmy Fallon nen an inkawmnaah hian Mike Tyson chuan boxer phuah chawp, rothap zet mai pahnih Rocky Balboa leh Ivan Drago te pawh a takah awm se a hneh theih ve ve a rin thu a sawi chhuak.

Tun hnaia UFC chawlhsantu Conor McGregor chu boxing ring-ah vawi khat a inlan a, Floyd Mayweather nen an inhnek a, a chak lo zawkah a tang a. Tyson chuan kum 32-a upa Irish fighter chu a fak hle a, boxing ring chhunga a chet dan kha a rin aia a that thu a sawi a ni.

“Boxing khel mumal ngai miah lo a ni a, chu ti chung chuan kum 100 chhunga boxer ropui ber pawl nen round 10 ngawt an inhnek thei a, Conor kha a fakawm ka ti khawp mai,” tiin Tyson chuan a sawi.