Tukin zing khan Copa America match hmuhnawm tak Brazil leh Colombia ten an khel a, Colombia chuan si khat faiin Murillo goal hmangin hnehna an chang a, he match hi a pui leh rem rem khawp mai, red card pahnih phawrh a ni a, Group C-ah hian Venezuela, Brazil leh Colombia te chuan vawi khat theuh hnehna an chang a, dinhmun tha ber sawi theih a la ni lo.
Inkhelh tawp rualin Neymar thinrim chuan ball kawh takin a pet a, Pablo Armero hnung zangah a per chiang hle, hemi avang hian Bacca a thinur hle a, Neymar chu a rawn nam leng dawr, an buai zui nghal a. Referee chuan Neymar leh Bacca te hi inkhelh zawh hnu ni mahse red card a pe ve ve ta a ni. Direct red card a nih avangin match hnih tal chu hrem an ni ve ve dawn a, hremna nasa zawk an tawk dawn em tih erawh tunah chuan a la sawi theih loh.
Brazil 0-1 Colombia
Murillo 36′
Brazil : Jefferson, Dani Alves, Thiago Silva, Miranda, Filipe Luis, Mendes Trindade (Tardelli Martins - 76' ), Fernandinho, Willian (Douglas Costa - 69' ), Neymar , Fred (Coutinho - 45' ), Roberto Firmino
Colombia : Ospina, Zuñiga, Zapata, Murillo, Armero, Sánchez, Valencia (Mejía - 80' ), Cuadrado, Rodríguez, Falcao (Ibarbo - 69' ), Gutiérrez (Bacca - 76' )
Team hnihte hi 2014 Brazil World Cup quarter final-ah khan an lo inhmachhawn tawh a, Brazil chuan 2-1 in hnehna chang mahse Colombia defender Zuñiga chuan Neymar hnungah a khupa a do avangin Neymar zawn chhuah a ni a, World Cup a khel chhunzawm thei ta lo a nih kha. Kha match kha a physical hle a, a hmuhnawm bawk a, card pawh phawrh a ni nual a nih kha.
2015 Copa America Group C-ah team hnihte hi an awm ho leh ta ngei a, beisei lawk ang ngeiin tukin match pawh a rorum leh hle mai. Goal awmchhun hi 36th mins-a lut niin, set piece atanga ball kal zel Brazil defender ten an clear theih loh chu Murillo chuan pen 8 vel lek atangin a ke veilam chuan a pet goal a, ram tana a goal hmasa ber a ni a, hei hi Colombia chuan an chakpui ta a ni.
Colombia hian an match hmasa berah Venezuela an hneh loh avangin an match dawt leh Brazil chu hneh ngei an tum avangin a tir atangin na takin an nawr nghal a. Teofile Gutierrez a vannei hle a, Alves laka red card a chawi teuh hle a, referee chuan yellow card a pe a, Murillo goal khung hma hian Villa player Carlos Sanchez chuan goal a khung teuh hle a, a shot tha zet chu an lo dan per sak a ni.
Chelsea pan mai tur Radamel Falcao chuan Brazil lakah a thiamna a lan chhuah tir hleithei lova, second half tir lamah Ibarbo chuan a rawn thlak a, goal awmchhun khungtu Murillo a chesual teuh hle, a back pass hlauhawm tak chuan Ospina a tibuai hle a, Firmino chuan hei hi a hmang tangkai ta bik chuang lo, pen 12 vel atangin a pet out hlauh a ni. 1991 hnuah Colombia chuan Brazil a vawi khat nan an hneh ve ta a ni.