Tun hnaia game lar tak mai, PlayerUnkown’s Battlegrounds hmangin sum tam tham tak mai lakluh theihna hun a inhawng mek a. PUBG hmanga inelna a awm dawn hnai a, hemi atana lawmman an chhawp zawng zawng chu Rs. 50 lakh lai a ni.

Tencent chuan Mizo thalai pawhin an buaipui em em PUBG hmanga inelna kutpui an buatsaih dawn a, anni hian Oppo an thawhpui ang a, India ramah PUBG Mobile Campus Championship an huaihawt dawn a. He tournament hi thla khat chhung neih tur a ni ang a, September 26 atanga tanin October 21 thleng a awh ang.

PUBG Mobile Campus Championship 2018 ah hian India ram khawpui 30 vel bawra college 1000 chuanga zirlaite tan chauh tel theih a ni ang a, he tournament neih a nih chhung hian social media hrang hrang hmangin live stream a ni thin ang a, finals chu a bik taka buatsaih a ni ang a, Bangalore khawpuia neih a ni dawn a ni.

India rama mobile gaming tournament lian ber turah hian a thlawna inziahluh theih a ni a, September 7 atang khan www.pubgmobile.in ah free registration an ti tan a, September 23 thleng inziahluh theih a ni dawn a. College pakhat atanga team pakhat zelah hian member pali zel awm tur a ni a, registration titu hi automatic in team captain an ni nghal zel dawn a ni.

Semi final a huam knockout round 4 a awm ang a, a tawpah team 20 te chu Bangalore khawpuia a bika buatsaih hunah an inel ang a, tu emaw chuan cheng nuai chuang daih an hawn thei dawn a ni.

Pakhatna chauh hi lawmman dawng tur an ni dawn lo a, Tencent chuan award chi hrang hrang an sem tel dawn a, MVP mai bakah tournament neih chhunga MVP rating nei tha ber te, tournament chhung zawnga kill ngah ber hnenah ‘Executioner Award’ an pe dawn bawk a. Revive ngun ber hnenah Medic award an hlan ang a, health khawl hnem ber hnenah Redeemer award hlan a ni ang a, lobby pakhata kill nei hnem ber hnenah Rampage freak award pek a nih dawn bakah survive rei ber hnenah Lone Ranger award hlan a ni bawk ang.