14 Jan 2020 02:59

inkhel

Club zinga sum la lut hnem ber Barcelona

Barcelona chu Europe khawmualpuia football club zingah nikum chhunga sum la lut hnem ber an ni.

La Liga champion Barcelona chuan 2018-19 season chhung khan £741.1 million zet an la lut niin Deloitte Football Money League chuan an tarlang a. A hmaa pakhatna dinhmun luahtu Real Madrid chu pahnihnaah an tla thla thung a, Manchester United chu pathumnaah an awm a ni.

Spanish club lian Barcelona chuan kum hmasa lama an sum lak luh an khum chiang hle a, a hma kumah £611.6 million an la lut a, nikumah erawh £741.1 million zet an la lut a, hei vang hian pakhatnaah an awm theih phah a ni.

Real Madrid chuan kum hmasa lamah £665.2 million an la lut a, an sum lak luh hi nikumah sang zawkin, £667.5 million zet chu tling mah se an hmelma club Barcelona chu an pha lo hle.

Manchester United chu pathumnaah an awm a, Premier League club zingah chuan sum la lut hnem ber an ni a. Nikum chhunga an sum lak luh zawng zawng chu £627.1 million niin, a hma kuma an lak luh £589.8 million chu an khum chiang hle a ni.

Bundesliga champion Bayern Munich chu palinaah an awm a, Ligue 1 champion Paris Saint-Germain chu pangana an ni a, an hnuai chiahah hian Premier League champion Manchester City an awm bawk a. Liverpool, Tottenham leh Chelsea te chu City hnuaiah hian an intlar a, Serie A champion Juventus chu Top 10 ah an lang pha chiah a ni.

Top 20

1. Barcelona : £741.1 million
2. Real Madrid : £667.5 million
3. Manchester United : £627.1 million
4. Bayern Munich : £581.8 million
5. Paris St-Germain : £560.5 million
6. Manchester City : £538.2 million
7. Liverpool : £533 million
8. Tottenham : £459.3 million
9. Chelsea : £452.2 million
10. Juventus : £405.2 million
11. Arsenal : £392.7 million
12. Borussia Dortmund : £332.4 million
11. Atletico Madrid : £324 million
14. Inter Milan : £321.3 milllion
15. Schalke : £286.3 million
16. Roma : £203.6 million
17. Lyon : £194.6 million
18. West Ham : £190.7 million
19. Everton : £187.7 million
20. Napoli : £182.8 million