10 Sep 2019 10:37

inkhel

Club sang paruk zingah United an tel lo thei: Michael Owen

Michael Owen chuan Manchester United chu bul an tan that loh thu sawiin, season tawpah chuan club chungnung paruk zinga an tel loh theih thu a sawi chhuak.

Season liam taah khan Manchester United chu parukna an ni a, UEFA Champions League khelh theihna chu point 5 in an pha ta lo a. An club tantute chuan tun season-ah beiseina nei sang tawh viau mah se, an beisei angin an awm thei rih lo a ni.

Ole Gunnar Solskjaer chuan Jose Mourinho hmun ruak a luah a, a nghet loa a awm laiin United chu a chet thatpui em avangin club thuneitute chuan a nghetin an la a, contract pangngai an ziahpui a. Hetianga a laka beiseina an neih san viau lai hian tun season-a game 4 an khelh tawhah vawi khat chiah an la chak ve a ni.

Manchester United striker hlui Michael Owen chuan an dinhmun siam tha zel turin an hma lama Premier League club liante en loin, an hnuaia awm club hrang hrangte chu thlir se a fuh zawka a rin thu a sawi.

Owen chuan, “Kumin kum tir lamah kha chuan Manchester United hi Premier League club chungnung pali zingah an tel theih an ring hlawm viau mai a. Thil hi a mak thei viau mai a, tunah chuan khatiang ngaihdan kha neih a harsa rih hle,” a ti.

“Season thar an tan a, an lo rin lawk leh an beisei lawk angin thil a kal chiah lo a, a chungnung paruk zingah tal an lan theih an beisei leh tawh a. A sang zual paruk zingah hi chuan an tel thei tih a chiang reng a, tun aia an khelh that chhoh theih phawt chuan a sang pali zingah hian an tel thei ngei ngei dawn a ni,” a ti bawk.

England striker hlui chuan, “Premier League huangah hian team dang tha tak tak an awm nual a, heng team hrang hrangte hian a chung lam paruk zinga tel theih dan an ngaihtuah ve hlawm a. Engmah hi sawi chian theih a ni rih lo a, boruak awm zel dan tur lo thlir zel bak tih theih a awm lo,” a ti.

“Tun dinhmunah chuan thil awm dan hi a fuh rih lo hle a. Hmabak a la tam a, hengah hian tha taka an chet chhoh theih phawt chuan club chungnung pali zingah hian an lang thei hrim hrim a. A tam thei ang ber chak tumin khel chho se an dinhmun chu a tha chho sawt sawt mai ang,” a ti bawk.

Nipui transfer window inhawn lai khan Manchester United chuan player thar lei nan £150 million vel zet an hmang a, British player naupang zawkte chu an melh hmasak an ni.

Aaron Wan-Bissaka, Harry Maguire leh Daniel James te chu an lei a, Michael Owen chuan tunah chuan squad an nei tha ta bawk a, an team in hma a sawn phah ngei a beisei thu a sawi chhuak a ni.