20 Nov 2020 11:02

bakteaJr.

Mizo tlangval

Club pariatin title kan inchuh: Klopp

Premier League champion lai Liverpool manager Jurgen Klopp chuan tun season-ah Premier League title chu club pariat vel laiin an inchuh dawn niin a sawi.

Season liamta leh a hma chiah season khan Liverpool leh Manchester City te chiahin title hi an inchuh tih theih a ni a, kuminah erawh han tha fal an awm rih lo hle a, hmahruai mektu pawh Leicester City niin, Liverpool hi pathumnaah an awm mek.

Tun hnai kum nga chho velah Premier League-ah club tha zual paruk an awm tih theih a ni a, Chelsea, Liverpool, Manchester City, Arsenal, Tottenham leh Manchester United te niin, big six tia sawi mai thin an ni.

Tun season-ah erawh kum dang a la ang lova, Leicester bakah Southampton, Aston Villa leh Everton te che tha in Arsenal leh Manchester United te chu club lian zinga beisei pha lo zual an ni mek.

Club engzatin nge tun season-ah Premier League title inchuh tih zawhna chhangin Klopp chuan, “Pariat vel lai an awm thei dawnin ka hria a, title race hi a inhawng zau hle a, mahse kei chuan pawi tihna eng mah ka nei lo,” a ti.

Liverpool hian inhliam an nei nasa hle a, mahse Klopp chuan a buai phah loh thu a sawia, kum dang ang a nih loh thu a sawi bawk. Klopp chuan inhliam an ngah chungchang sawiin, “Min tibuai lo hle a, tawng mawi lo nilo se, ‘care’-na em em ka nei hran lo.

“Tu emaw ber hian point 100 an hlawhchhuak bik dawn lo niin a langa, tun season hi kum dang aiin kar li laiin a tawi zawka mahse game awm zat erawh a danglam lo. Chuvang chuan point 100 hmuh ang kha a theih dawnin ka hre lova, point 87 pawh a hla hle in ka hria,” a ti.