Angel Di Maria chuan Juventus a chhuahsan ta a, nikum nipui bazar inhawn lai khan PSG-a a contract a zo a, free agent-in kum khat chhung atan Italian club Juventus a zawm. Kum khat hnuah kum 35 mi Di Maria chuan Juventus hi a chhuahsan leh ta a ni.

Khawi lam nge a pan dan tih a la hriat loh a, Europe-ah a inkhel chhunzawm zel dawn em? tih chu zawhna chhan harsa tak a ni mek.

"Hun harsa tak paltlangin Juventus-a ka hun tawp chu ka hmang ta a, rilru hlim tak chungin ka chhuak ta e. Ka theihna zawng zawng hlan mah ila, trophy kan hlawhchhuak thei ta lo a ni," tiin Di Maria chuan social media-ah a tarlang.

"Engmah hlawhchhuak loin ka chhuak dawn ta chu a ni a, hetih lai hian thian tha tak tak ka tawng a, dressing room boruak nuam tak te ka tawng bawk.

"Juventus ka pan tirha ka team-mate min lo ngaina nghal em emtu te chungah ka lawm em em a, mahni in ang maiin ka ngai a ni.

"Juventus mi leh sa zawng zawng, nitina an mi ngainatna min lantir zawng zawng te chungah thinlung takin lawmthu ka sawi e," tiin Di Maria chuan a tarlang bawk.

Juventus tana a debut game-ah a che tha hle, goal khat a khung bakah assist vawi khat a nei nghal. World Cup-ah Argentina a champion pui bawk a. 

World Cup khelh zawhin hliam a tawk neuh neuh a, a fitness avangin coach Massimiliano Allegri chuan a chhawr tam ta lo.

2022-23 season khan Di Maria hian Juventus tan game 40 khelin, goal 8 a khung bakah assist vawi 7 a nei. Thuneitute lam atanga hremna an tawh avangin Juventus chu point 10 paih sak an ni a, Serie A khelh zawh takah 7-na niin, season tharah Europa Conference League an khel dawn ta a ni.